Chidambaram: ‘మేం ఓడలేదు.. వాళ్లే గెలిచారు’ అన్నట్లుంది నిర్మలమ్మ లెక్క..!

ఇంటర్నెట్‌ డెస్క్‌: రూపాయి విలువ పతనంపై కేంద్ర ఆర్థిక మంత్రి నిర్మలా సీతారామన్‌ చేసిన వ్యాఖ్యలకు మాజీ ఆర్థిక మంత్రి, కాంగ్రెస్‌ సీనియర్‌ నేత పి. చిదంబరం గట్టి కౌంటర్‌ ఇచ్చారు. ఎన్నికల్లో ఓడిపోయిన అభ్యర్థులు సాధారణంగా చెప్పే ‘మేం ఓడలేదు.. వాళ్లే గెలిచారు’ అన్నట్లుగా ఉందంటూ వ్యంగ్యాస్త్రాలు గుప్పించారు. అసలేం జరిగిందంటే..

రూపాయి విలువ జీవితకాల కనిష్ఠానికి పడిపోవడంపై ఆర్థిక మంత్రి నిర్మలా సీతారామన్‌ ఆదివారం స్పందించారు. ఓ మీడియా సమావేశంలో మాట్లాడుతూ.. రూపాయి బలహీనపడటం లేదని, డాలర్‌ విలువే బలపడుతోందని వ్యాఖ్యానించారు. ఇతర దేశాల కరెన్సీలతో పోల్చుకుంటే రూపాయి విలువ ఆశాజనకంగానే ఉన్నట్లు చెప్పారు.

అయితే ఈ వ్యాఖ్యలపై ప్రతిపక్షాల నుంచి విమర్శలు వస్తున్నాయి. నిర్మలమ్మ వ్యాఖ్యలపై రాజ్యసభ ఎంపీ చిదంబరం ట్విటర్‌లో స్పందిస్తూ.. ‘‘రూపాయి బలహీనపడట్లేదు.. డాలరే బలపడుతోందని ఆర్థిక మంత్రి చెప్పారు. ఇది అక్షరాలా నిజమే..! ఎన్నికల్లో పోటీ చేసి ఓటమిపాలైన అభ్యర్థి లేదా పార్టీ కూడా ఎప్పుడూ ఇలాగే ‘మేం ఓడిపోలేదు. అవతలి పార్టీనే గెలిచింది’ అని చెబుతుంటారు’’ అంటూ ఆర్థిక మంత్రికి చురకలంటించారు.