CHINA: పాక్‌ మీడియాను గుప్పిట పెట్టుకొనేందుకు చైనా యత్నం

ఇంటర్నెట్‌డెస్క్‌: పాక్‌ పాలకులతో ఉన్న సంబంధాలను వాడుకొని ఆ దేశ మీడియా సంస్థలను గుప్పిట పెట్టుకొనేందుకు చైనా యత్నాలు మొదలు పెట్టింది. ఈ విషయాన్ని ఓ ఆంగ్ల వార్తా పత్రిక తన రిపోర్టులో పేర్కొంది. ముఖ్యంగా పశ్చిమ దేశాల ప్రచారాన్ని అడ్డుకొంటూ.. ప్రజల అభిప్రాయాలను ప్రభావితం చేసేందుకు ఈ వ్యూహం అమలు చేస్తోంది.

సెప్టెంబర్‌లో పాక్‌-చైనా మీడియా ఫోరం సదస్సును తొలిసారి నిర్వహించారు. ఇరు దేశాలకు వ్యతిరేకంగా జరిగే ప్రచారాన్ని అడ్డుకోవడంపై దీనిలో చర్చించారు. తమ దేశాలపై జరిగే దుష్ప్రచారాన్ని అడ్డుకొంటామని ఈ ఫోరంలో పాల్గొన్నవారు ప్రతిజ్ఞ చేశారు. ఇందు కోసం చైనా-పాకిస్థాన్‌ మీడియా కారిడార్‌ను ఏర్పాటు చేసి ఇరు దేశాల మధ్య సంబంధాలు, సమన్వయాన్ని బలోపేతం చేస్తామన్నారు. ఈ క్రమంలో పాకిస్థాన్‌ మీడియాపై చైనా ఓ పర్యవేక్షణ సంస్థను ఏర్పాటు చేసే అవకాశం ఉంది. ఈ సంస్థ పాక్‌ మీడియాలో ప్రచురించాల్సిన అంశాలను వెల్లడించడంతో పాటు సెన్సార్‌షిప్‌ వంటి వాటిని పరిశీలిస్తుంది. పాక్‌లోని చైనా రాయబార కార్యాలయం ఆధ్వర్యంలో ‘షినూవా ఉర్దూ’, ‘గ్వాదర్‌ ప్రో’, ‘చైనా గ్లోబల్‌’ టెలివిజన్‌ వంటి సంస్థలు పనిచేస్తాయని వాషింగ్టన్‌ టైమ్స్‌ పత్రిక పేర్కొంది.