చైనాలో భారీగా పెరిగిన ఎగుమతులు

బీజింగ్‌: కరోనా తగ్గుముఖం పట్టడంతో కర్మాగారాలను తిరిగి తెరిచిన నేపథ్యంలో చైనా ఉత్పత్తులకు అంతర్జాతీయంగా భారీ డిమాండ్‌ ఏర్పడింది. దీంతో ఆ దేశ ఎగుమతులు భారీగా పెరిగాయి. 2020 జనవరి, ఫిబ్రవరితో పోలిస్తే 2021లో అదే కాలానికి చైనా ఎగుమతులు ఏకంగా 60 శాతం వృద్ధి చెందాయి. 2020 డిసెంబర్‌లో కేవలం 18.1 శాతం మాత్రమే ఉండగా విశ్లేషకుల అంచనాలను దాటి ఈ ఏడాది తొలి రెండు నెలల్లో భారీగా పెరిగాయి. చైనా ఎగుమతుల విలువ రెండు నెలల్లో 468.9 బిలియన్‌ డాలర్లకు చేరింది. దిగుమతుల్లో కూడా 22.2 శాతం వృద్ధి నమోదై 365.6 బిలియన్లకు చేరుకున్నాయి. అమెరికా మాజీ అధ్యక్షుడు డొనాల్డ్‌ ట్రంప్‌ హయాంలో సుంకాలు పెంచినా ఈ రెండు నెలల్లో చైనా నుంచి అమెరికాకు కూడా ఎగుమతులు 87.3 శాతం పెరిగాయి.