China: చైనాను ఐరాస గుర్తించి 50 ఏళ్లు.. జిన్‌పింగ్‌ కీలక వ్యాఖ్యలు

బీజింగ్: పీపుల్స్‌ రిపబ్లిక్‌ ఆఫ్‌ చైనా(పీఆర్‌సీ)ను ఐరాస అధికారికంగా గుర్తించి 50 ఏళ్లు పూర్తవుతోంది. ఈ సందర్భాన్ని పురస్కరించుకుని చైనా అధ్యక్షుడు షీ జిన్‌పింగ్‌ సోమవారం కీలక వ్యాఖ్యలు చేశారు. చైనా ఎల్లప్పుడూ ప్రపంచ శాంతిని కోరుకుంటుందని, అంతర్జాతీయ నియమాలను పాటిస్తుందని పేర్కొన్నారు. చైనా, తైవాన్‌ మధ్య ఉద్రిక్త పరిస్థితులు ఇటీవల తారస్థాయి చేరుకున్న తరుణంలో జిన్‌పింగ్‌ వ్యాఖ్యలు ప్రాధాన్యం సంతరించుకున్నాయి. చైనా ప్రపంచ శాంతి నిర్మాత అని, అంతర్జాతీయ నియమాలను సంరక్షిస్తుందని జిన్‌పింగ్‌ వెల్లడించారు.

ప్రపంచ పటంపై ఆధిపత్య ధోరణి, అధికార రాజకీయాలు, ఏకపక్షవాదాన్ని తాము వ్యతిరేకిస్తామని జిన్‌పింగ్‌ ఈ సందర్భంగా స్పష్టం చేశారు. ప్రాంతీయ సంఘర్షణలు, తీవ్రవాదం, వాతావరణ మార్పులు, సైబర్ సెక్యూరిటీ, బయో సెక్యూరిటీ తదితర అంశాల్లో మరింత సహకారం అవసరమని ప్రపంచ దేశాలకు పిలుపునిచ్చారు. దీంతోపాటు భారత్‌, జపాన్‌, ఆగ్నేయాసియా దేశాలతో భూ, జల వివాదాలపై తమ వాదనలను సమర్థించుకున్నారు. 1971లో ఐరాస.. పీపుల్స్ రిపబ్లిక్ ఆఫ్ చైనా(పీఆర్‌సీ)ను గుర్తించింది. అదే సమయంలో రిపబ్లిక్‌ ఆఫ్‌ చైనా(తైవాన్‌)కు గుర్తింపును తొలగించింది.