మరో మహత్తర క్రతువులో భాగమయ్యాం: పూరి

తొలిరోజు 56.5 లక్షల డోసుల రవాణా

దిల్లీ: కరోనా వైరస్‌ను తరిమికొట్టే తుది అంకానికి భారత్ సంసిద్ధమవుతోంది. తొలిదశ టీకా రవాణాలో భాగంగా టీకా డోసులు దేశంలోని పలు నగరాలకు చేరుకుంటున్నాయి. ఈ మహత్తర క్రతువులో విమానయాన శాఖ కీలక పాత్ర పోషిస్తోందని పౌర విమానయాన శాఖ మంత్రి హర్‌దీప్ సింగ్ పూరి ట్విటర్ వేదికగా స్పందించారు. తొలిరోజు తొమ్మిది విమానాల్లో 56.5లక్షలో డోసులను పలు నగరాలకు పంపిస్తున్నామని తెలిపారు.

‘పౌర విమానయాన రంగం మరో ముఖ్యమైన మిషన్‌ను ప్రారంభించింది. టీకా రవాణా ప్రారంభమైంది. ఎయిరిండియా, స్పైస్‌జెట్, గోఎయిర్, ఇండిగోకు చెందిన తొమ్మిది విమానాల్లో మొదటి రోజు 56.5లక్షల డోసులను సరఫరా చేస్తున్నాం. పుణె నుంచి దిల్లీ, చెన్నై, కోల్‌కతా, గువహటి, షిల్లాంగ్, అహ్మదాబాద్, హైదరాబాద్, విజయవాడ, భువనేశ్వర్, పట్నా, బెంగళూరు, లఖ్‌నవూ, చండీగఢ్‌‌కు ఈ టీకా డోసులు చేరనున్నాయి’ అని మంత్రి ట్వీట్ చేశారు. కాగా, ఇప్పటికే టీకా డోసులు పుణె నుంచి దేశ రాజధాని నగరం దిల్లీ, అహ్మదాబాద్‌కు చేరుకున్నాయి. 

ఇవీ చదవండి:

కరోనా కేసుల్లో భారీ తగ్గుదల 

బయలు దేరిన కరోనా టీకా!