CJI: అప్పట్లో నేనూ మూన్‌లైటింగ్‌ చేశా: సీజేఐ

దిల్లీ: మూన్‌లైటింగ్‌ (moonlighting) అనే పదం ఇటీవల బాగా ప్రాచుర్యంలోకి వచ్చిన సంగతి తెలిసిందే. ముఖ్యంగా ఐటీ రంగంలో ఈ మధ్యకాలంలో తరచూ వాడుతున్నారు. ఒక కంపెనీతో పనిచేస్తూనే మరో కంపెనీ ప్రాజెక్టులనూ చేపట్టడాన్ని మూన్‌లైటింగ్‌గా పరిగణిస్తారు. దీన్ని సమర్థించేవారూ.. వ్యతిరేకించేవారూ ఉన్నారు. ఈ చర్చను పక్కనపెడితే సుప్రీం కోర్టు ప్రధాన న్యాయమూర్తి జస్టిస్‌ డీవై చంద్రచూడ్‌ (Justice Chandrachud) సైతం మూన్‌లైటింగ్‌ చేశారట. తాను 20ల్లో ఉన్నప్పుడు మూన్‌లైటింగ్‌ చేశానని ఆయన స్వయంగా చెప్పారు. ఇటీవల ఓ సందర్భంలో ఈ విషయాన్ని బయటపెట్టారు. దీనికి సంబంధించిన వీడియోను ‘బార్‌ అండ్‌ బెంచ్‌’ ట్విటర్‌లో పోస్ట్‌ చేసింది.

‘‘తాను 20ల్లో ఉన్నప్పుడు ఓ వైపు లాయర్‌గా పనిచేస్తూనే.. మరోవైపు ఆల్‌ ఇండియా రేడియోలో రేడియో జాకీగా పనిచేశా. ‘ప్లే ఇట్‌ కూల్’‌, ‘డేట్‌ విత్‌ యూ’, ‘సండే రిక్వెస్ట్‌’ వంటి ప్రోగ్రాములు చేశా. ఈ విషయం చాలా మందికి తెలీదు’’ అని గత స్మృతులను నెమరువేసుకున్నారు జస్టిస్‌ చంద్రచూడ్‌. ఈ సందర్భంగా తన అభిరుచులనూ పంచుకున్నారు. తనకు మ్యూజిక్‌ అంటే చాలా ఇష్టమని, రోజూ సంగీతం వినడాన్ని ఇష్టపడతానని తెలిపారు. రోజువారీ జీవితంలో మ్యూజిక్‌ ఇప్పటికీ భాగంగానే ఉందని చెప్పారు. లాయర్ల సంగీతం పూర్తయ్యాక ఇంటికెళ్లి తనకిష్టమైన మ్యూజిక్‌ను ఆస్వాదిస్తానని ఛలోక్తి విసిరారు.