Cold Waves: ఉత్తరాది గజ గజ.. ఐఎండీ కీలక ప్రకటన

దిల్లీ: హిమాలయ వాయవ్య భాగం నుంచి వీస్తున్న చలిగాలులతో (Cold Waves) ఉత్తర భారతం (North India) గజగజలాడుతోంది. దేశ రాజధాని దిల్లీ (Delhi)తో పాటు జమ్ముకశ్మీర్‌ (Jammu Kashmir), హిమాచల్‌ప్రదేశ్‌ (Himachal pradesh) లోని పలు ప్రాంతాల్లో చలి తీవ్రత పెరిగింది. మరోవైపు విపరీతంగా మంచు కురుస్తుండటంతో ఉష్ణోగ్రతలు కనిష్ఠ స్థాయికి పడిపోతున్నాయి. ఈ నేపథ్యంలో భారత వాతావరణ శాఖ (ఐఎండీ) కీలక ప్రకటన చేసింది. చలిగాలుల తీవ్రత మరో 24 గంటల పాటు కొనసాగుతుందని, ఆ తర్వాత తగ్గుముఖం పడే అవకాశముందని తెలిపింది. ప్రజలు తగిన జాగ్రత్తలు తీసుకోవాలని కోరింది. అయితే, పంజాబ్‌, హరియాణా, ఛత్తీస్‌గఢ్‌ రాష్ట్రాల్లో దట్టమైన పొగమంచు పరిస్థితులు కొనసాగే అవకాశముందని తెలిపింది.

మరోవైపు ట్రోఫోస్పిరిక్‌ ద్రోణి కొనసాగుతుండటం వల్ల జనవరి 7, 8, 9 తేదీల్లో పశ్చిమ హిమాలయ ప్రాంతాల్లో తేలికపాటి నుంచి మోస్తరు వర్షాలు కురిసే సూచనలు ఉన్నట్లు ఐఎండీ తెలిపింది. 10 నుంచి 13 తేదీల మధ్య కొన్ని చోట్ల మెరుపులతో కూడిన వర్ష సూచన ఉన్నట్లు పేర్కొంది. వాయవ్య హిమాలయ ప్రాంతాల్లో వర్ష ప్రభావం మరింత ఎక్కువగా ఉంటుందని పేర్కొంది. ఇవాళ దిల్లీలో ఉష్ణోగతలు కనిష్ఠ స్థాయిలో నమోదయ్యాయి. అయానగర్‌ ప్రాంతంలో 1.8 డిగ్రీల ఉష్ణోగ్రత నమోదైంది. సఫ్తార్‌ గంజ్‌లో 4 డిగ్రీలు, దిల్లీ రిడ్జ్‌లో 3.3 డిగ్రీల ఉష్ణోగత్రలు నమోదైనట్లు ఐఎండీ వెల్లడించింది.