ఆరోగ్య మంత్రిని బలిపశువు చేశారు: మల్లికార్జున ఖర్గే

దిల్లీ: కరోనా కట్టడిలో విఫలమైనందుకు ప్రధాని నరేంద్ర మోదీ స్వయంగా తాను బాధ్యత వహించకుండా గతంలో ఆరోగ్యశాఖ మంత్రిగా ఉన్న హర్షవర్దన్‌ను బలిపశువుని చేశారని రాజ్యసభలో ప్రతిపక్ష నేత మల్లికార్జున ఖర్గే విమర్శించారు. రాజ్యసభలో కరోనాపై జరిగిన చర్చలో పాల్గొన్న ఖర్గే.. మోదీని నమ్మి ప్రజలు దీపాలు వెలిగించి, ప్లేట్లు మోగిస్తే ఆయన మాత్రం వారిని నిరాశపర్చారని మండిపడ్డారు. కరోనా మరణాలపై కేంద్ర ప్రభుత్వం తప్పుడు లెక్కలు చెబుతోందని ఆరోపించారు. ఓ వైపు భౌతిక దూరం పాటించాలని హితవు పలుకుతూ.. మరోవైపు శాసనసభ ఎన్నికల సందర్భంగా భారీ బహిరంగ సభలు నిర్వహించారని ఖర్గే విమర్శలు గుప్పించారు.

ఇదిలాఉంటే, దేశంలో కరోనా మహమ్మారి నియంత్రణలో ప్రభుత్వం సరిగా వ్యవహరించడం లేదంటూ ప్రతిపక్ష పార్టీలు కేంద్రంపై ఆగ్రహం వ్యక్తం చేస్తున్నాయి. అంతేకాకుండా వ్యాక్సిన్‌ విధానంపైనా అనుమానాలు వ్యక్తం చేస్తున్నాయి. వీటికితోడు తాజాగా వెలుగు చూసిన పెగాసస్‌ హ్యాకింగ్‌ ఉదంతం, ధరల పెరుగుదల, రైతుల ఆందోళనలు వంటి కీలక అంశాలపై చర్చ జరగాల్సిందేనని పట్టుబడుతున్నాయి. విపక్షాల ఆందోళనలతో ఉభయసభలూ అట్టుడికిపోతున్నాయి.