‘అక్కడ’ గ్రామం.. చైనా వితండ వాదం

బీజింగ్‌: కయ్యాలమారి చైనా మరోమారు భారత్‌తో వివాదానికి దిగుతోంది. అరుణాచల్‌ ప్రదేశ్‌లో ఓ భూభాగం తమదే అంటూ వితండవాదానికి దిగింది. ఈ ప్రాంతంలో చైనా ఏకంగా ఓ గ్రామాన్నే నిర్మించిందన్న వార్తలు ఇటీవల దుమారాన్ని సృష్టించాయి. కాగా, ఆ భూభాగం తమదే అని.. తమ ప్రాంతంలో, తమ ప్రజల కోసం నిర్మాణాలు చేపట్టడం అసాధారణం, తప్పిదమేమీ కాదని చైనా బుకాయిస్తోంది. ఓ మీడియా సమావేశంలో అడిగిన ప్రశ్నకు, ఆ దేశ విదేశీ వ్యవహారాల శాఖ ప్రతినిధి హువా చునియాంగ్‌ పై విధంగా స్పందించారు.

అది తమ దేశంలో అంతర్భాగమని.. ఈశాన్య భాగంలో ఉన్న రాష్ట్రమని భారత్‌ ఎన్నోమార్లు తేల్చి చెప్పింది. ఈ నేపథ్యంలో ఇక్కడి భూభాగంలో చైనా వందకు పైగా ఇళ్లు, రోడ్డు తదితర సౌకర్యాలతో ఓ గ్రామాన్ని నిర్మించినట్టు వార్తలు వెలువడ్డాయి. ఈ విషయమై భారత్‌ ఆచితూచి స్పందించింది. తమ సార్వభౌమత్వానికి భంగం కలిగించే అన్ని పరిణామాలపై నిరంతరం ఓ కన్నేసి ఉంచుతామని ప్రకటన చేసింది.  తమ భూభాగాన్ని కాపాడుకునేందుకు ‘తగిన’ చర్యలు తీసుకుంటామని కూడా హెచ్చరించింది.

ఇదీ చదవండి..

చైనా గ్రామం.. వివరణ కోరిన చిదంబరం