Cylinder Blast: ఘోరం.. పెళ్లిలో పేలిన ఐదు సిలిండర్లు

జైపూర్‌: రాజస్థాన్‌ (Rajasthan)లోని జోధ్‌పూర్‌లో ఘోర ప్రమాదం జరిగింది. పెళ్లి వేడుకల్లో సిలిండర్లు (Cylinder Blasts) పేలి ఐదుగురు దుర్మరణం చెందగా.. దాదాపు 50 మంది తీవ్రంగా గాయపడ్డారు. గురువారం రాత్రి ఈ ఘటన చోటుచేసుకుంది. అధికారులు తెలిపిన వివరాల ప్రకారం.. 

జోధ్‌పూర్‌లోని భంగ్రా గ్రామంలో గురువారం రాత్రి ఓ ఇంట్లో పెళ్లి వేడుకలు జరుగుతున్నాయి. అతిథులకు వంటలు సిద్ధం చేస్తుండగా వంట గదిలో ఉన్న ఐదు సిలిండర్లు పేలాయి. దీంతో భారీగా మంటలు చెలరేగాయి. పేలుడు తీవ్రతకు ఇల్లు కొంత భాగం కూలిపోయింది. ఈ ఘటనలో ఐదుగురు అక్కడికక్కడే మృతిచెందారు. వీరిలో ఇద్దరు చిన్నారులు కూడా ఉన్నారు. మరో 49 మంది గాయపడ్డారు. సమాచారమందుకున్న పోలీసులు, రెస్క్యూ సిబ్బంది వెంటనే అక్కడకు చేరుకుని సహాయక చర్యలు చేపట్టారు. గాయపడిన వారిని వెంటనే ఆసుపత్రికి తరలించారు. క్షతగాత్రుల్లో 12 మందికి తీవ్రంగా కాలిన గాయాలు అవడంతో వారి పరిస్థితి విషమంగా ఉన్నట్లు తెలుస్తోంది.