Bipin Rawat: గంగమ్మ ఒడికి రావత్​ దంపతుల అస్థికలు

హరిద్వార్‌: భారత త్రిదళాధిపతి బిపిన్​ రావత్​  ఆయన సతీమణి మధులిక అస్థికలను శనివారం ఉదయం ఉత్తరాఖండ్ హరిద్వార్​లోని గంగానదిలో వారి కుమార్తెలు కృతిక, తరణి కలిపారు. శుక్రవారం సాయంత్రం దిల్లీలోని బ్రార్​ స్క్వేర్​ శ్మశానవాటికలో వారి అంత్యక్రియలను నిర్వహించారు.  శనివారం ఉదయం చితాభస్మాల్ని సేకరించి.. నేరుగా హరిద్వార్​ చేరుకుని నదిలో కలిపారు. నదీ తీరంలో వారి ఆత్మకు శాంతి చేకూరాలని, హిందూ సంప్రదాయం ప్రకారం అన్ని కార్యక్రమాలు పూర్తి చేశారు. ఈనెల 8న తమిళనాడులోని జరిగిన హెలికాప్టర్​ ప్రమాదంలో సీడీఎస్​ బిపిన్​ రావత్​ దంపతులు ప్రాణాలు కోల్పోయారు. శుక్రవారం దిల్లీలోని బ్రార్​ స్క్వేర్​​లో అధికారిక లాంఛనాలతో జరిపిన అంత్యక్రియల్లో త్రివిధదళాలు గౌరవసూచికంగా 17 శతఘ్నులను గాల్లోకి పేల్చి వందనం సమర్పించారు. సీడీఎస్‌ అంత్యక్రియల్లో 800 మంది సర్వీస్‌ సిబ్బంది పాల్గొన్నారు. కేంద్ర రక్షణ మంత్రి రాజ్‌నాథ్‌ సింగ్‌, ఉత్తరాఖండ్‌ ముఖ్యమంత్రి పుష్కర్‌ సింగ్‌ , దిల్లీ సీఎం అరవింద్‌ కేజ్రీవాల్‌తో పాటు పలువురు రాజకీయ ప్రముఖులు తదితరులు హాజరై తుది వీడ్కోలు పలికారు.