Manipur landslide: 42కు చేరిన మణిపుర్‌ మృతుల సంఖ్య.. ఇంకా లభించని 25 మంది ఆచూకీ..!

గువాహటి: మణిపుర్‌ నోనీ జిల్లాలో రైలు మార్గం నిర్మాణ పనులు జరుగుతున్న చోట కొండచరియలు విరిగిపడిన దుర్ఘటనలో మృతుల సంఖ్య 42కు చేరింది. జిరిబమ్‌-ఇంఫాల్‌ మార్గంలో తుపుల్‌ రైల్వే యార్డు వద్ద జరిగిన ఈ ఘటనలో ఇంకా 25 మంది కోసం అధికారులు విసృతంగా గాలింపు చేపడుతున్నారు. అయితే వర్షాలు ఈ గాలింపు చర్యలకు అడ్డంకిగా మారుతున్నాయి. ప్రమాదం జరిగి నాలుగు రోజులు ముగుస్తుండటంతో ఆచూకీ లభించని వారంతా మృతిచెంది ఉంటారని అధికారులు ప్రాథమికంగా నిర్ధరించుకున్నట్లు తెలుస్తోంది.

శిథిలాల కింద నుంచి ఇప్పటివరకు 42 మంది మృతదేహాలు లభ్యమయ్యాయని, వారిలో 27 మంది టెరిటోరియల్ ఆర్మీ సిబ్బంది, 15 మంది పౌరులు ఉన్నారని గువహటిలోని రక్షణ శాఖ ప్రతినిధి తెలిపారు. ఆచూకీ లభించని 20 మంది కోసం గాలిస్తున్నామని, చివరి వ్యక్తి దొరికేవరకు చర్యలు కొనసాగుతాయన్నారు. ప్రతికూల వాతావరణం, భారీ వర్షాలు ఈ ప్రక్రియను ఆలస్యం చేస్తున్నట్లు తెలిపారు. సైనిక బృందాలు, అస్సాం రైఫిల్స్, ఎస్‌డీఆర్‌ఎఫ్‌, ఎన్‌డీఆర్‌ఎఫ్‌ బృందాలు సహాయక చర్యల్లో పాల్గొంటున్నాయి. ఇప్పటివరకు 13 మంది జవాన్లను, ఐదుగురు పౌరులను సహాయక సిబ్బంది రక్షించినట్లు అధికారులు వెల్లడించారు.