Rajnath Singh: తొలిసారి జలాంతర్గామిలో రాజ్‌నాథ్‌ సింగ్‌.. నౌకాదళ సామర్థ్యాల ప్రత్యక్ష పరిశీలన

ఇంటర్నెట్‌ డెస్క్‌: కేంద్ర రక్షణ శాఖ మంత్రి రాజ్‌నాథ్‌ సింగ్‌ తొలిసారి జలాంతర్గామిలో ప్రయాణించారు. కర్ణాటకలోని కార్వార్‌ నౌకదళ స్థావరం నుంచి కల్వరి క్లాస్‌ ‘ఐఎన్‌ఎస్‌ ఖండేరీ’లో శుక్రవారం ఆయన సముద్రయానం చేశారు. ఐఎన్‌ఎస్‌ ఖండేరీ ప్రయాణంలో అద్భుతమైన, థ్రిల్లింగ్ ఎక్స్‌పీరియన్స్‌ కలిగిందని ట్వీట్ చేశారు. ఈ సందర్భంగా సబ్‌మెరైన్‌ సిబ్బందితో కలిసి దిగిన ఫొటోలను పంచుకున్నారు. ‘సముద్రపు అడుగున గంటల తరబడి గడిపా. అత్యాధునిక కల్వరి క్లాస్ సబ్‌మెరైన్ పోరాట సామర్థ్యాలను గమనించాన’ని పేర్కొన్నారు. నీటి అడుగున భారత నావికాదళం సామర్థ్యాలను మొదటిసారి ప్రత్యక్షంగా పరిశీలించిన మంత్రి.. దేశ భద్రతపై తనకు భరోసా ఉందని వ్యాఖ్యానించారు.

‘భారత నావికాదళం.. ఆధునిక, శక్తిమంతమైన, విశ్వసనీయ శక్తి. ఇది అన్ని పరిస్థితుల్లోనూ అప్రమత్తంగా, పరాక్రమంగా, విజేతగా ఉండగల సామర్థ్యాన్ని కలిగి ఉంది. నౌకాదళం చేస్తున్న సన్నాహాలు.. ఎలాంటి దురాక్రమణలను రెచ్చగొట్టేందుకు కాదు. హిందూ మహాసముద్ర ప్రాంతంలో శాంతి భద్రతల నిర్వహణ కోసమేన’ని మంత్రి పేర్కొన్నారు. రాజ్‌నాథ్‌ గతంలో యుద్ధ, నిఘా విమానాలు, యుద్ధ నౌకల్లో ప్రయాణించారని.. అయితే  జలాంతర్గామిలో ప్రయాణం ఇదే తొలిసారని సంబంధిత వర్గాలు తెలిపాయి. కార్వార్‌ నౌకదళ స్థావరంలో ‘ప్రాజెక్ట్ సీ బర్డ్’ కింద చేపడుతోన్న అభివృద్ధి పనుల పురోగతిని సమీక్షించేందుకు గురువారం మంత్రి ఇక్కడికి చేరుకున్నారు. ఏడాది వ్యవధిలో ఇది రెండో సందర్శన. గతేడాది జూన్ 24న సైతం నేవల్‌ బేస్‌లోని ప్రాజెక్ట్ ప్రాంతాలు, స్థలాలను ఆయన ఏరియల్ సర్వే చేశారు.