Manish Sisodia: జైలు నంబర్‌ 1లో సిసోదియా.. ధ్యానానికి అనుమతినివ్వండి..

దిల్లీ: మద్యం కుంభకోణం కేసు (Delhi excise scam)లో అరెస్టయిన దిల్లీ మాజీ ఉపముఖ్యమంత్రి, ఆమ్‌ ఆద్మీ పార్టీ (AAP) నేత మనీశ్‌ సిసోదియా (Manish Sisodia)ను తిహాడ్‌ జైలుకు తరలించారు. ఈ కేసులో ఆయనకు న్యాయస్థానం 14 రోజుల జ్యుడీషియల్‌ కస్టడీ విధించిన విషయం తెలిసిందే. దీంతో కోర్టు విచారణ అనంతరం సిసోదియాను నేరుగా తిహాడ్‌ జైలు (Tihar Jain)కు తీసుకొచ్చారు. అక్కడ జైలు నంబర్‌ 1 గదిని ఆయనకు కేటాయించారు. జైల్లో భగవద్గీతతో పాటు కళ్లజోడు, డైరీ, పెన్ను, వైద్యులు సూచించిన మందులను ఉంచుకునేందుకు కోర్టు అనుమతినిచ్చింది. విపాసన ధ్యానం చేసేందుకు అనుమతినివ్వాలని సిసోదియా తరఫు న్యాయవాది కోర్టును కోరగా.. ఆ అభ్యర్థనను పరిశీలించాలని జైలు అధికారులను న్యాయస్థానం ఆదేశించింది.

ప్రభుత్వ మద్యం విధాన రూపకల్పన, అమలులో అవకతవకలు చోటుచేసుకున్న వ్యవహారంపై జరుపుతున్న దర్యాప్తులో భాగంగా ఇటీవల సిసోదియా (Manish Sisodia)ను సీబీఐ (CBI) అరెస్టు చేసిన విషయం తెలిసిందే. ఈ కేసులో న్యాయస్థానం తొలుత సీబీఐ కస్టడీ విధించింది. ఆ కస్టడీ నేటితో ముగియడంతో సోమవారం ఆయనను కోర్టులో హాజరుపర్చారు. అయితే కస్టడీ పొడిగించమని సీబీఐ కోరకపోవడంతో.. ఆయనకు జ్యుడీషియల్‌ కస్టడీని విధించారు. దీంతో మార్చి 20 వరకు ఆయన జైల్లోనే ఉండనున్నారు.

మరోవైపు, ఈ కేసులో బెయిల్‌ కోసం సిసోదియా (Manish Sisodia) దిల్లీ (Delhi) కోర్టులో పిటిషన్ దాఖలు చేశారు. ఆ పిటిషన్‌ను స్వీకరించిన న్యాయస్థానం.. దానిపై తమ స్పందన తెలియజేయాలంటూ సీబీఐకి నోటీసులు జారీ చేసింది. అనంతరం ఆ విచారణను 10వ తేదీకి వాయిదా వేసింది. బెయిల్‌ పిటిషన్‌పై వచ్చే శుక్రవారం మరోసారి విచారణ జరగనుంది.