GIPMER: మలయాళంలో మాట్లాడితే కఠిన చర్యలు

నర్సులకు జిప్మర్‌ ఉత్తర్వులు.. అనంతరం వెనక్కి

దిల్లీ: ఆసుపత్రి పరిధిలో మలయాళం మాట్లాడితే కఠిన చర్యలు తప్పవంటూ దిల్లీకి చెందిన ఓ మెడికల్‌ వైద్యశాల తమ నర్సులకు ఉత్తర్వులు జారీ చేసింది. ఇక్కడికి వచ్చే రోగులకు, ఆసుపత్రిలో పనిచేసే ఇతర సిబ్బందికి ఆ భాష అర్థం కాదు కాబట్టి అది అసౌకర్యాన్ని కలిగిస్తుందని.. ఆసుపత్రి పరిధిలో ఉన్నప్పుడు ఆ భాష మాట్లాడొద్దని స్పష్టం చేసింది. అయితే వివిధ వర్గాల నుంచి వ్యతిరేకత ఏర్పడటంతో ఆ ఉత్తర్వులను వెనక్కి తీసుకుంది.

దేశంలోని అనేక ఆసుపత్రుల్లో కేరళకు చెందిన నర్సులు పనిచేస్తూ ఉంటారు. అయితే దిల్లీలోని ప్రముఖ గోవింద్ బల్లభ్ పంత్ ఇన్‌స్టిట్యూట్ ఆఫ్ పోస్ట్ గ్రాడ్యుయేట్ మెడికల్ ఎడ్యుకేషన్ అండ్ రీసెర్చ్ (జిప్మర్) శనివారం ఓ వివాదాస్పద సర్క్యులర్‌ జారీ చేసింది. ఇక్కడ పనిచేసే నర్సులు మలయాళంలో మాట్లాడొద్దని.. కేవలం హిందీ లేదా ఇంగ్లిష్ మాత్రమే మాట్లాడాలని పేర్కొంది. లేదంటే కఠిన చర్యలు తప్పవని హెచ్చరించింది. ఈ ఉత్తర్వులపై పలు సంఘాలు మండిపడ్డాయి. జీబీ పంత్‌ నర్సుల సంఘం అధ్యక్షుడు లీలాధర్‌ రామచంద్రాని మాట్లాడుతూ.. యాజమాన్యానికి, నర్సులకు మధ్య ఎలాంటి పొరపొచ్చాలు లేవని.. ఓ రోగి చేసిన ఫిర్యాదు మేరకు జిప్మర్‌ ఈ నిర్ణయం తీసుకుందని తెలిపారు. కాగా ఓ భాషను మాట్లాడొద్దని చెప్పడం సరికాదన్నారు. యాజమాన్యం ఉత్తర్వులను నర్సులు పాటించేందుకు సిద్ధంగా లేరని వెల్లడించారు.

ఈ ఘటనపై కాంగ్రెస్‌ స్పందించింది. మాతృభాషను మాట్లాడొద్దని చెప్పడం వారి హక్కులను కాలరాయడమేనని విమర్శించింది. ఓ భాషను మాట్లాడొద్దని చెప్పడం ఆ భాషపై వివక్ష చూపడమేనని కాంగ్రెస్‌ ముఖ్యనేత రాహుల్‌ గాంధీ ఆరోపించారు. మాతృభాషను మాట్లాడొద్దని చెప్పడం ఎంతమాత్రం ఆమోదయోగ్యం కాదని, ఎంతో ప్రమాదకరమని కాంగ్రెస్‌ నేత శశిథరూర్‌ పేర్కొన్నారు. కాగా విమర్శలు వెల్లువెత్తడంతో జిప్మర్‌ ఆ ఉత్తర్వులను ఆదివారం వెనక్కి తీసుకున్నట్లు సమాచారం.