Viral news: 24 ఏళ్ల క్రితమే మృతి చెందాడు..కానీ, ఇప్పుడు అరెస్టయ్యాడు!

దిల్లీ: దాదాపు 24 ఏళ్ల క్రితమే మృతిచెందిన వ్యక్తిని దిల్లీ పోలీసులు తాజాగా అరెస్టు చేశారు. అదెలా సాధ్యం అనుకుంటున్నారా? ఆ ‘దొంగ’ తెలివితేటలకు ముక్కున వేలేసుకోవాల్సిందే. 1991లో జరిగిన ఓ దొంగతనం కేసులో ఆ వ్యక్తి నిందితుడు. అప్పట్లో  అతడిని అరెస్టు చేసేందుకు పోలీసులు తీవ్ర ప్రయత్నాలు చేశారు. అయినా చిక్కలేదు. అన్ని అధికారిక రికార్డుల్లో తాను చనిపోయినట్లు నకిలీ పత్రాలు సృష్టించాడు. ఆ తర్వాత అజ్ఞాతంలోకి వెళ్లిపోయాడు.

రికార్డులను పరిశీలించిన పోలీసులు నిందితుడు చనిపోయాడని ధ్రువీకరించుకున్నారు. అదే విషయాన్ని 1998లో కోర్టుకు తెలిపారు. పోలీసుల వాదనను పరిగణలోకి తీసుకున్న న్యాయస్థానం కేసును పెండింగ్‌లో పెట్టేసింది. అయితే, తాజాగా ఆ నిందితుడి గురించి పోలీసులకు సమాచారం అందింది. దీంతో పక్కా ప్రణాళికతో నిందితుడిని అరెస్టు చేశారు. గత 24 సంవత్సరాలుగా అతడు పరారీలో ఉన్నట్లు తెలిపారు. నకిలీ పత్రాలు తయారు చేసిన వ్యక్తి గురించి నిందితుడిని ప్రశ్నిస్తున్నారు.