Delhi: దిల్లీ అల్లర్లలో నిందితుడికి పెరోల్.. స్థానికుల భారీ స్వాగతం

దిల్లీ: దేశ రాజధానిలో చోటుచేసుకున్న అల్లర్లలో పోలీసుల పైనే తుపాకి ఎక్కుపెట్టిన ఓ వ్యక్తి సంచలనం సృష్టించిన సంగతి తెలిసిందే. ప్రస్తుతం ఆ నిందితుడు జైలులో ఉండగా.. తాజాగా పెరోల్‌పై బయటకు వచ్చాడు. ఈ సమయంలో నిందితుడికి ఇంటివద్ద భారీ స్వాగతం లభించింది. ఇందుకు సంబంధించిన వీడియోలు సామాజిక మాధ్యమాల్లో ప్రస్తుతం వైరల్‌గా మారాయి. 2020 ఫిబ్రవరి నెలలో ఈశాన్య దిల్లీలో రెండు వర్గాల మధ్య తీవ్రస్థాయిలో జరిగిన ఘర్షణల్లో 50 మందికి పైగా మృతిచెందగా వందలమంది గాయపడ్డారు. భారీస్థాయిలో ఆస్తినష్టం సంభవించింది.

ఈ కేసులో ప్రధాన నిందితుడిగా ఉన్న షారుఖ్‌ పఠాన్‌ తండ్రి ఇటీవల తీవ్ర అనారోగ్యానికి గురయ్యాడు. దీంతో తండ్రిని చూసేందుకు నిందితుడికి నాలుగు గంటలపాటు పెరోల్‌ లభించింది. ఈ సమయంలో నిందితుడు నివాసానికి వెళ్లే సమయంలో పోలీసులు ఎస్కార్ట్‌ ఇవ్వడంతోపాటు స్థానికుల నుంచి భారీ స్వాగతం లభించింది. చాలా మంది షారుఖ్‌పఠాన్‌ను అనుసరించడమే కాకుండా కరచాలనం చేసేందుకు ప్రయత్నించడం గమనార్హం. నాలుగు గంటల పెరోల్‌ ముగిసిన అనంతరం పఠాన్‌ తిరిగి జైలుకు వెళ్లాడు. మే 23న ఈ ఘటన చోటుచేసుకోగా ఈ వీడియోలు ప్రస్తుతం సోషల్‌ మీడియాలో వైరల్‌గా మారాయి.

ఇదిలాఉంటే, పౌరసత్వ సవరణ చట్టానికి (సీఏఏ) వ్యతిరేకంగా 2020లో దిల్లీలో చెలరేగిన అల్లర్ల సమయంలో షారుఖ్‌ పఠాన్‌ పోలీసులపైనే తుపాకి ఎక్కుపెట్టి భయభ్రాంతులకు గురిచేశాడు. దీంతో నిందితుడిపై అల్లర్లు, మతపరమైన శత్రుత్వాన్ని ప్రోత్సహించడంతోపాటు హత్యాయత్నం కేసులు నమోదయ్యాయి.