ఇండోనేసియా విమాన ‘బ్లాక్‌బాక్స్‌’లభ్యం..

జకార్తా: గత శనివారం ఇండోనేసియా రాజధాని జకార్తా నుంచి బయలుదేరి కొద్ది సేపటికే అదృశ్యమైన విమాన ఘటనలో కీలక పురోగతి కనిపించింది. ప్రమాద దర్యాప్తులో కీలకంగా పనిచేసే బ్లాక్‌బాక్సును మంగళవారం సముద్రం నుంచి వెలికితీశారు. శ్రీవిజయ విమానయాన సంస్థకు చెందిన ఈ బోయింగ్‌ 737-500 విమానంలో సిబ్బందితో సహా 62మంది ఉన్నారు. కాగా ఈ లభ్యమైన బ్లాక్‌బాక్స్‌ కాక్‌పిట్‌లోదా లేక విమాన డేటాకు సంబంధించినదా తెలియాల్సి ఉంది. ఈ బ్లాక్‌బాక్స్‌ను ఈ ఘటనపై విచారణ చేస్తున్న జాతీయ రవాణా భద్రతా కమిటీకి అప్పగించనున్నారు. ఈ విమాన శకలాలను అన్వేషించేందుకు సుమారు 160 మంది డైవర్లు కృషిచేస్తున్నారని ఇండోనేసియా నేవీ చీఫ్‌ యూదో మార్గోనో తెలిపారు. ఇప్పటి వరకూ లభించిన మానవ శరీర భాగాలు, విమాన శకలాలు సుమారు 23 మీటర్ల లోతులో గుర్తించినట్లు ఆయన వెల్లడించారు. సముద్రంలో లభ్యమైన శరీరభాగాలను ప్రయాణీకుల గుర్తింపు కోసం పోలీసులు స్వాధీనం చేసుకున్నారు.

ఇవీ చదవండి..

కరోనా కేసుల్లో భారీ తగ్గుదల

నూతన సాగు చట్టాల అమలుపై స్టే