అలా అయితే రైతుల ఆదాయాన్ని డబుల్‌ చేయలేం

నీతి ఆయోగ్‌ సభ్యుడు రమేశ్‌ చంద్‌

దిల్లీ: నూతన సాగు చట్టాల్ని వెంటనే అమలు చేయకపోతే 2020 కల్లా రైతుల ఆదాయాన్ని రెట్టింపు చేయాలన్న లక్ష్యాన్ని చేరుకునే అవకాశమే లేదని నీతి ఆయోగ్‌ సభ్యుడు రమేశ్‌ చంద్‌ అభిప్రాయపడ్డారు. ఆందోళన చేస్తున్న రైతులు ఈ విషయాన్ని దృష్టిలో పెట్టుకోవాలని కోరారు. వెంటనే ప్రభుత్వంతో చర్చలు జరపాలని సూచించారు. అలాగే జన్యుమార్పిడి ద్వారా పండించిన పంటలన్నింటిపై నిషేధం విధించడం సరికాదని ఈ సందర్భంగా ఆయన అభిప్రాయపడ్డారు. పంట రకం, దాని ప్రభావాన్ని బట్టి నిర్ణయం తీసుకోవాలని సూచించారు.

అటు కేంద్రం, ఇటు రైతులు ఇచ్చి పుచ్చుకునే ధోరణితో ముందుకు సాగితేనే సాగు చట్టాలపై నెలకొన్న ప్రతిష్టంభన తొలగిపోతుందని రమేశ్‌ అభిప్రాయపడ్డారు. ఏడాదిన్నర పాటు చట్టాల అమలు నిలిపివేసి ప్రభుత్వం ఇప్పటికే సాహసోపేతమైన నిర్ణయం తీసుకుందన్నారు. చట్టంలోని ప్రతి అంశాన్ని కూలంకషంగా చర్చించేందుకు సిద్ధంగా ఉన్నామంటున్న ప్రభుత్వ ప్రతిపాదనను రైతులు పరిగణనలోకి తీసుకోవాలని సూచించారు. ఇప్పుడు సమయం చాలా ఉందని.. నిదానంగా నిర్ణయం తీసుకోవాలని హితవు పలికారు. చట్టాల్లో చేయాల్సిన సవరణలను ప్రభుత్వం ముందుంచాలన్నారు. రైతులు ఇలాగే మొండిపట్టుతో ముందుకెళితే అది చివరకు వారినే దెబ్బతీస్తుందని అభిప్రాయపడ్డారు. రానురాను ఇది రాజకీయపరమైన రంగు సంతరించుకుంటోందని హెచ్చరించారు. అందుకే వెంటనే రైతులు అప్రమత్తమై సర్కార్‌తో చర్చించాలన్నారు.