Drone: పెన్షన్‌.. డ్రోన్‌ తీసుకొచ్చెన్‌..!

భువనేశ్వర్‌: ఇటీవలి కాలంలో డ్రోన్ల (Drone) వినియోగం విపరీతంగా పెరుగుతోంది. ఔషధాల నుంచి పార్శిళ్లు, నిత్యావసరాలు, ఫుడ్‌ డెలివరీల వరకు అనేక వస్తువులను సుదూర ప్రాంతాలకు వేగంగా అందించేందుకు డ్రోన్లను ఉపయోగిస్తున్నారు. అయితే దేశంలో తొలిసారిగా డ్రోన్‌తో డబ్బును డెలివరీ చేశారు. అదీ కూడా ఓ దివ్యాంగుడికి ఫించను (Pension) అందించారు.

ఒడిశా (Odisha)లోని నువాపడ జిల్లా భాలేశ్వరన్‌ పంచాయతీ పరిధిలోని మారుమూల భుక్తపద ప్రాంతానికి చెందిన హితారామ్‌ సత్నామీ పుట్టుకతోనే దివ్యాంగుడు. దట్టమైన అడవిలో ఉండే ఈ గ్రామం నుంచి అతడు పింఛను కోసం ప్రతి నెలా 2 కిలోమీటర్ల దూరంలో ఉండే పంచాయతీ కార్యాలయానికి వెళ్లాలి. అతడి గురించి తెలుసుకున్న సర్పంచి సరోజ్‌ అగర్వాల్‌.. ఆన్‌లైన్‌లో ఓ డ్రోన్‌ (Drone) కొనుగోలు చేశారు. దాని సాయంతో సత్నామీ ఇంటికి పింఛను డబ్బులను పంపించారు. దీంతో అతడికి ఎంతో ఊరట లభించనట్లైంది.

ఈ సందర్భంగా సర్పంచి సరోజ్‌ మాట్లాడుతూ.. ‘‘వివిధ దేశాల్లో డ్రోన్లతో వస్తువులను డెలివరీ చేయడం చూసి నాకు ఈ ఆలోచన వచ్చింది. దీంతో నేను డ్రోన్‌ కొనుగోలు చేసి ఆయనకు పింఛను (Pension) డబ్బులు పంపించాను’’ అని తెలిపారు. అయితే ఆ దివ్యాంగుడి కోసం సొంత డబ్బుతో డ్రోన్‌ను కొనుగోలు చేసిన సర్పంచి చొరవను పైఅధికారులు అభినందించారు. ‘‘పింఛను కోసం డ్రోన్‌ సేవలకు ప్రభుత్వం వద్ద ఎలాంటి విధివిధానాలు లేనప్పటికీ ఆమె సొంతంగా ఈ వినూత్న చర్యకు శ్రీకారం చుట్టారు’’ అని నువాపడా బ్లాక్‌ డెవలప్‌మెంట్ అధికారి సుబేదార్‌ ప్రధాన్‌ తెలిపారు.