Uttar Pradesh: రైల్లో ప్రయాణికురాలిపై మూత్ర విసర్జన..! టీటీఈ అరెస్టు

లఖ్‌నవూ: విమానాల్లో ప్రయాణికుల అనుచిత ప్రవర్తన(Unruly Behaviour) ఘటనలు చర్చనీయాంశంగా మారుతోన్న విషయం తెలిసిందే. ఇటీవల ఎయిర్‌ ఇండియా విమానంలో ఓ వ్యక్తి తోటి ప్రయాణికురాలిపై మూత్ర విసర్జన చేసిన వ్యవహారం దేశవ్యాప్తంగా దుమారం రేపింది. ఇదే తరహా ఘటన తాజాగా ఓ రైల్లో వెలుగుచూసింది. ఈ వ్యవహారంలో నిందితుడు ఓ రైల్వే అధికారి(TTE) కావడం గమనార్హం. మద్యం మత్తులో అతను ఓ ప్రయాణికురాలిపై మూత్ర విసర్జన చేసినట్లు ఆరోపణలు రావడంతో.. రైల్వే పోలీసులు(Railway Police) అతన్ని అరెస్టు చేశారు.

పంజాబ్‌లోని అమృత్‌సర్‌కు చెందిన ఓ మహిళ తన భర్తతో కలిసి ఆదివారం అమృత్‌సర్‌- కోల్‌కతా ఎక్స్‌ప్రెస్‌’లో ప్రయాణించారు. ఈ క్రమంలోనే అర్ధరాత్రి సమయంలో రైలు లఖ్‌నవూను సమీపిస్తుండగా.. ఆ మహిళ కేకలు విని ప్రయాణికులంతా గుమిగూడారు. అప్పటికే ఆమె.. మద్యం మత్తులో ఉన్న టికెట్‌ తనిఖీ అధికారి(టీటీఈ)ని పట్టుకుని ఉన్నారు. తనపై మూత్ర విసర్జన చేసినట్లు ఆమె ఆరోపించారు. దీంతో రైలు లఖ్‌నవూ చేరుకున్న అనంతరం అతన్ని రైల్వే పోలీసులకు అప్పగించారు. నిందితుడిని బిహార్‌కు చెందిన మున్నా కుమార్‌గా గుర్తించారు. ఈ మేరకు టీటీఈపై కేసు నమోదు చేసుకుని, దర్యాప్తు చేస్తున్నారు.