Suicide: వారిలో మూడింట ఒక వంతు మందికి ఆత్మహత్య ఆలోచనలు!

బాధితుల్లో 81 శాతం మంది తెలంగాణ సహా 12 రాష్ట్రాల్లోని వారే..

దిల్లీ: మానసిక అనారోగ్య బాధితులకు కౌన్సెలింగ్‌ కోసం ఏర్పాటుచేసిన హెల్ప్‌లైన్‌ను గత 18 నెలల్లో సంప్రదించినవారిలో..  మూడింట ఒక వంతు మంది కుంగుబాటు, ఆత్మహత్య ఆలోచనలతో బాధపడుతున్నట్లు తెలిపారని ఓ సర్వే వెల్లడించింది. గత నవంబరు - జనవరి మధ్య ఇటువంటి సంభాషణలు దాదాపు 40శాతం చోటుచేసుకున్నాయని ‘ది సైరస్‌ అండ్‌ ప్రియా వంద్రేవాలా’ ఫౌండేషన్‌ తెలిపింది. గతేడాది భారత్‌లో హత్యలు, కరోనా వైరస్‌ ద్వారా చోటుచేసుకున్న మరణాల కన్నా ఆత్మహత్య చేసుకొని చనిపోయినవారి సంఖ్యే ఎక్కువని ఆ సంస్థను నిర్వహిస్తున్న ప్రియా హీరానందని తెలిపారు. ప్రస్తుతం దేశంలో ఉన్న వైద్య విద్యార్థులందరూ మానసిక వైద్యులుగా మారినా, మానసిక అనారోగ్య సంక్షోభాన్ని పరిష్కరించడానికి సరిపోరని పేర్కొన్నారు. మానసిక ఆరోగ్యానికి సంబంధించిన సమస్యలపై తమను సంప్రదించినవారిలో 81శాతం తెలంగాణ సహా 12 రాష్ట్రాలకు చెందినవారు ఉన్నట్లు ఆమె తెలిపారు.