Ukraine Crisis: 219 మంది విద్యార్థులతో భారత్‌కు బయల్దేరిన విమానం

దిల్లీ: ఉక్రెయిన్​లో చిక్కుకున్న భారతీయులను స్వదేశానికి రప్పించేందుకు ముమ్మర ప్రయత్నాల్లో పురోగతి సాధిస్తున్నట్లు కేంద్ర విదేశాంగ శాఖ మంత్రి జైశంకర్​ పేర్కొన్నారు. రొమేనియా సరిహద్దులకు చేరుకున్న 219 మందితో తొలి ఎయిర్​ ఇండియా విమానం అక్కడినుంచి ముంబయికి బయల్దేరినట్లు ట్విట్టర్​ వేదికగా వెల్లడించారు. అందరినీ సురక్షితంగా స్వదేశానికి చేర్చేందుకు అహర్నిశలు పనిచేస్తున్నట్లు ఆయన తెలిపారు. ఈ అంశాలను స్వయంగా తానే పర్యవేక్షిస్తున్నానని మంత్రి అన్నారు. భారతీయుల తరలింపులో సహకారం అందించిన రొమేనియా విదేశాంగ శాఖ మంత్రి బోగ్దాన్​ అరెస్కూకు జైశంకర్‌ ఈ సందర్భంగా కృతజ్ఞతలు తెలిపారు.

భారతీయులకు సహాయం అందిస్తున్నాం

ఉక్రెయిన్​ నుంచి తప్పించుకొని తమ దేశానికి చేరుకున్న భారతీయులకు సహాయం చేస్తున్నామని భారత్​లోని పోలండ్​ రాయబారి ఆడమ్​ బురాకౌస్కీ పేర్కొన్నారు. ఉక్రెయిన్​పై దాడిని పోలండ్​తో పాటు యూరోపియన్​ యూనియన్​ దేశాలు తీవ్రంగా ఖండిస్తున్నాయన్నారు. పోలండ్​, ఇతర దేశాలు ఉక్రెయిన్​కు ఆయుధాలు సరఫరా చేస్తున్నాని తెలిపారు. ఐరోపా సమాఖ్య, ఇతర సంస్థలు కూడా రష్యాపై ఆంక్షలు విధించాయన్నారు. ఉక్రెయిన్​పై రష్యా తీవ్ర దాడులు తమ పౌరులకు కూడా పెద్ద సమస్యేనని ఆందోళన వ్యక్తం చేశారు. ఉక్రెయిన్​ నుంచి తప్పించుకొని తమ దేశానికి చేరుకున్న భారతీయులకు సహాయం చేస్తున్నామని పేర్కొన్నారు.