COVID-19: కరోనా సోకితే సంతానోత్పత్తిపై ప్రభావం.. తాజా పరిశోధనలో వెల్లడి!

దిల్లీ: కరోనా​ సోకిన పురుషుల్లో సంతానోత్పత్తి తగ్గుతుందా? వైరస్‌ స్వల్ప లక్షణాలతో అనారోగ్యానికి గురైన వారిలోనూ సంతానోత్పత్తి ప్రోటీన్లు దెబ్బతింటాయా? అంటే అవుననే అంటోంది తాజా అధ్యయనం. కొవిడ్​ సోకిన పురుషుల్లో సంతానోత్పత్తి తగ్గుతుందని ఐఐటీ బాంబే చేసిన ఓ అధ్యయనంలో తేలింది. వైరస్‌ సోకి స్వల్ప లక్షణాలు బయటపడిన వారిలోనూ సంతానోత్పత్తికి సంబంధించిన ప్రోటీన్లు దెబ్బతింటాయని అధ్యయనం తెలిపింది. ఐఐటీ బాంబేతో కలిసి జస్లోక్​ హాస్పిటల్, రీసెర్చ్​ సెంటర్​ పరిశోధకులు సంయుక్తంగా ఈ అధ్యయనాన్ని నిర్వహించారు. పురుషుల వీర్యకణాలపై చేసిన ఈ పరిశోధనను.. ఏసీఎస్​ ఒమెగా జర్నల్​ గతవారం ప్రచురించింది.

కొవిడ్​కు కారణమైన సార్స్-2 వైరస్​ ప్రధానంగా శ్వాసకోశ వ్యవస్థను ప్రభావితం చేస్తుందని, దాంతో పాటు ఇతర వ్యవస్థలను దెబ్బతీస్తుందని పరిశోధకులు తెలిపారు. 10 మంది ఆరోగ్యవంతమైన పురుషుల వీర్యంతో పాటు 17 మంది కొవిడ్​ బారిన పడి కోలుకున్న వారి వీర్య నమూనాలను విశ్లేషించినట్లు వెల్లడించారు. ఆరోగ్యవంతమైన వ్యక్తులతో పోలిస్తే.. కరోనా సోకిన వారిలో వీర్య కణాలు గణనీయంగా తగ్గినట్లు అధ్యయనంలో తేలింది. సంతానోత్పత్తికి సంబంధించిన రెండు ప్రోటీన్లు సెమెనోజెలిన్​1, ప్రోసాపోసిన్​ కోలుకున్న వారిలో తక్కువగా ఉన్నట్లు పరిశోధకులు వివరించారు. అయితే, ఈ అంశాన్ని నిర్ధరించేందుకు మరిన్ని అధ్యయనాలు అవసరమని పరిశోధకులు అభిప్రాయపడ్డారు.