Facebook: యువకుడి ప్రాణాన్ని కాపాడిన ఫేస్‌బుక్‌ సాంకేతికత

లఖ్‌నవూ: సామాజిక మాధ్యమం ఫేస్‌బుక్‌లోని ఓ సాంకేతిక పరిజ్ఞానం ఆత్మహత్యకు సిద్ధమైన ఓ విద్యార్థి ప్రాణాలను కాపాడింది. ఈ ఘటన ఉత్తర్‌ప్రదేశ్‌లో జరిగింది. ‘నీట్‌’ పరీక్షలో ఉత్తీర్ణత సాధించలేకపోయానన్న ఆవేదనతో లఖ్‌నవూకు చెందిన 29 ఏళ్ల ఓ విద్యార్థి ఆత్మహత్య చేసుకోవాలనుకున్నాడు. దీనికి సంబంధించి అతడు ఫేస్‌బుక్‌లో ఓ సందేశాన్ని ఉంచాడు. రియల్‌ టైం సాంకేతికతతో ఫేస్‌బుక్‌ దీన్ని గుర్తించింది. వెంటనే ఉత్తర్‌ప్రదేశ్‌ పోలీసులను అప్రమత్తం చేస్తూ సందేశాన్ని పంపింది. దీంతో రంగంలోకి దిగిన పోలీసులు హుటాహుటిన ఆ విద్యార్థి ఇంటికి చేరుకుని అతణ్ని రక్షించారు. కుంగుబాటు, ఇతర ప్రాణహాని పరిస్థితులకు సంబంధించిన సందేశాలు పోస్ట్‌ అయినప్పుడు వెంటనే సమాచారం అందించేలా ఫేస్‌బుక్‌, యూపీ పోలీసు శాఖ మధ్య గతంలో ఒప్పందం కుదిరింది. దీంతోనే విద్యార్థిని రక్షించడం సాధ్యమైందని పోలీసులు చెప్పారు.