CEC: ఎన్నికల నిర్వహణకు.. సవాలుగా మారుతోన్న సోషల్‌ మీడియా ఫేక్‌ కథనాలు

దిల్లీ: దేశంలో ఎన్నికలను (Elections) స్వేచ్ఛగా నిర్వహించేందుకు సామాజిక మాధ్యమాల్లో వచ్చే అసత్య కథనాలు ఇబ్బందిగా మారుతున్నట్లు భారత ఎన్నికల ప్రధాన కమిషనర్‌ (CEC) రాజీవ్‌ కుమార్‌ ఆందోళన వ్యక్తం చేశారు. నిష్పక్షపాత ఎన్నికల నిర్వహణలో ఇది ప్రధాన సవాల్‌గా మారడం పెరుగుతోందన్నారు. జర్మనీ విదేశాంగశాఖ బృందంతో సమావేశమైన ఆయన.. ప్రజాస్వామ్య స్ఫూర్తి అనేది భారత చరిత్ర, సంప్రదాయాల్లో భాగంగా ఉందన్నారు.

భారత్‌లో పర్యటిస్తోన్న జర్మనీ విదేశీ వ్యవహారాలశాఖ మంత్రి అన్నాలేనా బేర్‌బాక్‌ (Annalena Baerbock) నేతృత్వంలోని బృందం.. భారత ప్రధాన ఎన్నికల కమిషనర్‌ను దిల్లీలోని నిర్వాచన్‌ సదన్‌లో (Nirvachan Sadan) సమావేశమయ్యింది. ఈ సందర్భంగా దేశంలో ఎన్నికల నిర్వహణ తీరును వివరించిన ఆయన.. మొత్తం 95 కోట్ల ఓటర్లు, 11లక్షల పోలింగ్‌ స్టేషన్లు ఉన్నట్లు తెలిపారు. ఎన్నికల విధుల్లో కోటి మంది సిబ్బంది ఉంటారని.. ప్రతి స్థాయిలోనూ రాజకీయ పార్టీల భాగస్వామ్యం ఉంటుందని వివరించారు. వీటితోపాటు ఎన్నికల ప్రక్రియలో సాంకేతిక పరిజ్ఞానం వినియోగాన్ని తెలియజేశారు. ఎన్నికల నిర్వహణకు అవసరమైన సామగ్రిని తరలించడాన్ని పక్కనబెడితే.. ప్రతి ఎన్నికల్లోనూ సామాజిక మాధ్యమాల్లో వచ్చే అసత్య వార్తలు నిష్పాక్షిక పోలింగ్‌కు అడ్డంకిగా మారడం పెరుగుతోందన్నారు.

భిన్న సవాళ్లు ఎదురైనప్పటికీ.. ప్రపంచంలోనే అతిపెద్ద ప్రజాస్వామ్య దేశంలో ఎన్నికలను సజావుగా నిర్వహిస్తున్న తీరుపై జర్మనీ విదేశీ వ్యవహారాలశాఖ మంత్రి ప్రశంసలు కురిపించారు. ఈ సందర్భంగా అక్కడ ఏర్పాటు చేసిన నమూనా పోలింగ్‌లో పాల్గొని  ఈవీఎంలో ఓటు చేశారు. ఈవీఎంల పనితీరు, వాటిలో భద్రతా ప్రమాణాలు, స్టోరేజీలకు సంబంధించి అంశాలను ఆమెతోపాటు వారి ఎంపీల బృందం పరిశీలించింది.