ఆప్‌ ఎప్పుడూ రైతుల పక్షమే: కేజ్రీవాల్‌

దిల్లీ: ఆమ్‌ ఆద్మీ పార్టీ ఎప్పుడూ రైతుల పక్షానే ఉంటుందని దిల్లీ ముఖ్యమంత్రి అరవింద్‌ కేజ్రీవాల్‌ అన్నారు. రైతుల డిమాండ్లు సరైనవేనని పేర్కొన్నారు. వారు శాంతియుతంగా నిరసనలు వ్యక్తం చేస్తుంటే కించపరచడం సరికాదన్నారు. ఈ మేరకు ఆయన ఒక ట్వీట్‌లో తెలిపారు. దిల్లీ సరిహద్దుల్లో ధర్నా చేస్తున్న భారతీయ కిసాన్‌ యూనియన్‌ నాయకుడు రాకేశ్‌ టికాయిత్..‌‌ కేజ్రీవాల్‌కు కృతజ్ఞతలు తెలుపుతూ చేసిన ఒక ట్వీట్‌కు ఆయన బదులిచ్చారు. ‘‘రాకేశ్‌ జీ, మేం ఎప్పుడూ రైతుల వెంటే ఉంటాం. మీ డిమాండ్లు సరైనవి. మీ ఉద్యమాన్ని కించపరచడం, దేశ ద్రోహులుగా చిత్రీకరించడం చాలా తప్పు. రైతు నాయకులపై కేసులు పెట్టడం సరికాదు’’ అని కేజ్రీవాల్‌ ఆ ట్వీట్‌లో పేర్కొన్నారు.

దిల్లీ ఉప ముఖ్యమంత్రి మనీశ్‌ సిసోడియా శుక్రవారం ఘాజీపూర్‌ సరిహద్దుకు వెళ్లారు. రైతుల కోసం దిల్లీ ప్రభుత్వం ఏర్పాటు చేసిన మంచినీటి కేంద్రాలు, టాయిలెట్లు ఇతర ఏర్పాట్లను పరిశీలించారు. గణతంత్ర దినోత్సవం నాడు దిల్లీలో రైతులు చేపట్టిన ట్రాక్టర్‌ ర్యాలీ హింసాత్మకంగా మారిన విషయం తెలిసిందే. దీంతో రైతులు సరిహద్దులను ఖాళీ చేయాలని అధికారులు ఆదేశించారు. దిల్లీ-యూపీ సరిహద్దుల్లోని ఘాజీపూర్‌లో ధర్నా చేస్తున్న రైతులు గురువారం రాత్రిలోపు ఖాళీ చేయకుంటే వారిని బలవంతంగా ఖాళీ చేయిస్తామని పోలీసులు పేర్కొన్నారు. రైతులు దీనికి అంగీకరించకపోవడంతో పరిస్థితులు ఉద్రిక్తంగా మారాయి. బలవంతంగా ఖాళీ చేయిస్తే తాను ఉరేసుకుంటానని రాకేశ్‌ టికాయిత్‌ హెచ్చరించారు.

ఇవీ చదవండి..

ఖాళీ చేయిస్తే ఉరేసుకోడానికి సిద్ధం

ఎర్రకోట ఘటన..దేశ ద్రోహం కేసు నమోదు