finance ministry: ప్రభుత్వ శాఖల వ్యయాలపై కేంద్రం ఆంక్షల తొలగింపు!

ఇంటర్నెట్‌డెస్క్‌: కేంద్ర ప్రభుత్వ, మంత్రిత్వ శాఖల వ్యయాలపై విధించిన ఆంక్షలను నేడు ఆర్థిక శాఖ తొలగించింది. దీంతో అవి ఈ ఆర్థిక సంవత్సరం బడ్జెట్‌ అంచనాలకు తగినట్లు ఖర్చులు చేయవచ్చు. ప్రభుత్వానికి వచ్చే ఆదాయాలు పెరుగుతుండటంతో ఆర్థిక శాఖ ఈ నిర్ణయం తీసుకొంది. కొవిడ్‌ సెకండ్‌ వేవ్‌ సమయంలో ఆదాయాలపై ప్రభావం పడటంతో ప్రభుత్వం ఈ నిర్ణయం తీసుకొంది.

‘‘జులై-సెప్టెంబర్‌ త్రైమాసికానికి ప్రభుత్వ శాఖల వ్యయాలు బడ్జెట్‌ అంచనాల్లో 20శాతం లోపు ఉండాలన్న మార్గదర్శకాలను పునఃసమీక్షించాము. వీటిని తక్షణమే ఉపసంహరించుకొంటున్నాము. మళ్లీ ఆదేశాలు వచ్చేవరకూ.. ఆయా మంత్రిత్వశాఖలు, డిపార్ట్‌మెంట్లు ఇక నుంచి వారి బడ్జెట్‌ అంచనాలకు తగినట్లు వ్యయాలు చేయవచ్చు’’ అని డిపార్ట్‌మెంట్‌ ఆఫ్‌ ఎకనామిక్‌ అఫైర్స్‌ శుక్రవారం పేర్కొంది. ఉక్కు, కార్మిక, పౌరవిమానయాన శాఖ వంటి 80శాఖల వ్యయాలను ప్రభుత్వం ఇప్పటి వరకు 20శాతం లోపు ఉండేట్లు కట్టడి చేసింది.