ఆసుపత్రికి నిప్పంటినా.. ఓపెన్‌-హార్ట్‌ సర్జరీ సక్సెస్‌!

రష్యాలో వైద్యుల ఘనత

మాస్కో: ఓవైపు ఆసుపత్రి అగ్ని ప్రమాదానికి గురై మంటలు చెలరేగుతున్నా.. వైద్యులు అత్యవసర పరిస్థితుల్లో సాహసోపేతంగా ఓ రోగికి ఓపెన్‌-హార్ట్‌ సర్జరీని పూర్తిచేశారు. రష్యాలోని బ్లాగోవెస్కెన్స్‌క్‌లో శుక్రవారం ఈ ఘటన చోటుచేసుకుంది. జార్‌ల కాలం నాటి ఇక్కడి ఆసుపత్రిలో వైద్యులు శస్త్రచికిత్సను ప్రారంభించిన కొద్దిసేపటికి మంటలు చెలరేగాయి. వైద్య సిబ్బంది ఏమాత్రం బెదరకుండా 2 గంటల పాటు సర్జరీని విజయవంతంగా పూర్తిచేసి రోగిని వేరేచోటుకు మార్చారు. ఆసుపత్రి అగ్ని ప్రమాదానికి గురైన వెంటనే అక్కడికి చేరుకున్న అగ్నిమాపక సిబ్బంది 2 గంటలకు పైగా శ్రమించి మంటలను అదుపు చేశారు. అదే సమయంలో ఓపెన్‌-హార్ట్‌ సర్జరీ చేస్తున్న గదికి అన్నివిధాలుగా సంరక్షణ ఏర్పాట్లు చేశారు. లోపలికి పొగ వెళ్లకుండా పెద్ద ఫ్యాన్లు ఏర్పాటు చేశారు. అలాగే ఆ గదికి విద్యుత్తు సరఫరాకు ఎలాంటి ఆటంకం కలగకుండా ప్రత్యేక కేబుళ్లను ఏర్పాటు చేశారు. 8 మంది వైద్యులు, నర్సులతో కూడిన బృందం సర్జరీలో పాల్గొంది. ‘‘మంటలు చెలరేగినా.. ఆ రోగిని కాపాడేందుకు మేం చేయగలిగిందంతా చేశాం’’ అని వైద్యులు తెలిపారు. ఈ ఆసుపత్రిని 1907లో నిర్మించారు. పైకప్పు చెక్కతో చేసింది కావడంతో నిప్పంటుకుని మంటలు చెలరేగినట్లు రష్యా అత్యవసర సేవల మంత్రిత్వశాఖ తెలిపింది. ఎవరికీ ఎలాంటి ప్రమాదం వాటిల్లకుండా ఆసుపత్రి నుంచి 128 మందిని ఖాళీ చేయించి సురక్షితంగా తరలించినట్లు తెలిపింది.