Delhi: మెట్రో స్టేషన్‌ పార్కింగ్‌లో భారీ అగ్ని ప్రమాదం.. 90 వాహనాలు దగ్ధం

దిల్లీ: దేశ రాజధాని దిల్లీలో భారీ అగ్ని ప్రమాదం సంభవించింది. ఆగ్నేయ దిల్లీ జామియానగర్‌ మెట్రో స్టేషన్‌ పార్కింగ్‌ ప్రాంతంలో జరిగిన ఈ ప్రమాదంలో దాదాపు 90 వాహనాలు అగ్నికి ఆహుతయ్యాయి. ప్రమాదంపై సమాచారం అందుకున్న అగ్నిమాపక సిబ్బంది హుటాహుటిన సంఘటనా స్థలానికి చేరుకొని 11 ఫైరింజన్ల సాయంతో అతి కష్టం మీద మంటలను అదుపులోకి తీసుకొచ్చారు.

అయితే ఈ ప్రమాదంలో ఎలాంటి ప్రాణ నష్టం జరగలేదని అధికారులు వెల్లడించారు. ఈ భారీ ప్రమాదంలో మెట్రో స్టేషన్‌ పార్కింగ్‌లో ఉన్న 10 కార్లు, ఓ బైక్‌, రెండు స్కూటర్లు, 30 కొత్త ఈ-రిక్షాలు, 50 పాత ఈ-రిక్షాలతో సహా పలు వాహనాలు మంటల్లో దగ్ధమైనట్లు దిల్లీ ఫైర్ సర్వీస్ డైరెక్టర్ అతుల్ గార్గ్ వెల్లడించారు. మంటలు వ్యాపించడానికి గల కారణాలను తెలుసుకుంటున్నట్లు ఆయన పేర్కొన్నారు.