కొవిడ్‌ ఆసుపత్రిలో అగ్నిప్రమాదం: 50 మంది మృతి

బాగ్దాద్‌: ఇరాక్‌లోని ఓ కొవిడ్‌ ఆసుపత్రిలో ఘోర అగ్ని ప్రమాదం సంభవించింది. ఈ ఘటనలో 50 మంది కరోనా బాధితులు చనిపోగా, మరో 13 మంది తీవ్రంగా గాయపడ్డారు. మృతుల సంఖ్య పెరిగే అవకాశం ఉన్నట్లు సమాచారం. ఇరాక్‌లోని నసీరియా పట్టణంలోని అల్‌- హుస్సేన్‌ కొవిడ్‌ ఆసుపత్రిలో ఈ ప్రమాదం చోటు చేసుకుంది. ఆసుపత్రి ప్రాంగణంలోని ఆక్సిజన్‌ ట్యాంక్‌ పేలి మంటలు వార్డుకు వ్యాపించినట్లు అక్కడి మీడియా వర్గాలు తెలిపాయి. 70 పడకలతో 3 నెలల క్రితం ఈ కరోనా వార్డును ప్రారంభించారు. 

సమాచారం అందుకున్న పోలీసులు, విపత్తు బృందాలు ఘటనా స్థలికి వెళ్లి సహాయక చర్యలు చేపట్టాయి. ఆసుపత్రిని మంటలతో పాటు దట్టమైన పొగలు అలుముకున్నాయి. దీంతో కొవిడ్‌ వార్డుల్లో చిక్కుకున్న బాధితులను వెలుపలికి తీసుకొచ్చేందుకు ఇబ్బందులు ఎదుర్కొన్నట్లు ఆరోగ్య సిబ్బంది తెలిపారు. ఈ ఏడాది ఏప్రిల్‌లో కూడా బాగ్దాద్‌లోని ఓ కొవిడ్‌ ఆసుపత్రిలో ఆక్సిజన్‌ ట్యాంక్‌ పేలి 82 మంది రోగులు చనిపోగా, 110 మంది గాయపడ్డారు. ఇరాక్‌ ఇప్పటివరకు 14 లక్షల కొవిడ్‌ కేసులు నమోదు కాగా, 17,000పైగా చనిపోయారు.