ఉత్తరాఖండ్‌: మృతులకు గుర్తుగా సంస్మరణ వనం

దేహ్రాదూన్‌: ఉత్తరాఖండ్‌లోని చమోలీ జిల్లాలో వరదల కారణంగా మరణించిన వారికి గుర్తుగా ఎన్‌టీపీసీ ఓ సంస్మరణ వనాన్ని అభివృద్ధి చేయనుంది. జోషిమఠ్‌లోని ఎన్‌టీపీసీ టౌన్‌షిప్‌లో ఆ సంస్థ డైరెక్టర్‌ యూకే భట్టాచార్య మొక్కలు నాటి ఈ వనాన్ని ప్రారంభించారు. మూడు హెక్టార్ల విస్తీర్ణంలో అభివృద్ధి చేయనున్న ఈ అడవికి స్మృతి వన్‌ అని నామకరణం చేశారు. జోషిమఠ్‌లో ఏర్పాటు చేసిన మృతుల సంతాప సభలో భట్టాచార్య ఈ విషయాన్ని ప్రకటించారు.

ఈనెల 7న ధౌలిగంగా ఉప్పొంగి వరదలు సృష్టించిన ప్రళయానికి తపోవన్‌ విద్యుత్కేంద్రం కొట్టుకుపోయింది. ఈ వరదల్లో 204 మంది గల్లంతయ్యారు. విద్యుత్కేంద్రంలోని సొరంగంలో చిక్కుకున్నవారి కోసం రెండు వారాలుగా గాలింపు చర్యలు కొనసాగుతున్నాయి. కాగా ఇప్పటివరకు 62 మృతదేహాలు లభ్యమయ్యాయి. మరికొందరి శరీర భాగాలు లభ్యమయ్యాయి. అవి ఎవరివో గుర్తించేందుకు అధికారులు ప్రయత్నిస్తున్నారు.