Assam: బాల్య వివాహాలు.. అస్సాంలో మరోసారి అరెస్టులు

గువహటి: రాష్ట్రంలో బాల్య వివాహాలు (Child Marriages), మాతా శిశు మరణాలను తగ్గించేందుకు అస్సాం (Assam) ప్రభుత్వం తీవ్రంగా యత్నిస్తోంది. ఈ అంశంలో సమాజంలో మార్పు తీసుకురావడంతో పాటు చిన్నారులకు మంచి భవిష్యత్తు కోసం కృషి చేస్తోంది. దీంతో బాల్య వివాహాం చేసుకున్నా.. అందుకు సహకరించినా వారిపై ప్రభుత్వం మరోసారి కొరడా ఝుళిపించింది. తాజాగా 800 మందికి పైగా అరెస్టు చేసిన్నట్లు రాష్ట్ర ముఖ్యమంత్రి హిమంత బిశ్వశర్మ (Himanta Biswa Sarma)ట్విటర్‌ వేదికగా వెల్లడించారు.

చట్ట వ్యతిరేకంగా బాల్య వివాహాలు చేసుకున్న వారిపై ఈ ఏడాది ప్రారంభం నుంచి ప్రభుత్వం అరెస్టులను కొనసాగిస్తోంది. దీనిలో భాగంగా మరోసారి రాష్ట్ర పోలీసులు నిందితులపై చర్యలు తీసుకుంటున్నారు. ఎఫ్‌ఐఆర్‌ల ఆధారంగా 800 మందికి పైగా తాజాగా అరెస్టు చేసినట్లు ముఖ్యమంత్రి హిమంత బిశ్వశర్మ వెల్లడించారు. అరెస్టుల సంఖ్య మరింత పెరిగే అవకాశం ఉన్నట్లు ఆయన తెలిపారు.

దేశ రాజధానిలో మోస్ట్‌వాంటెడ్‌ ఐసిస్‌ ఉగ్రవాది అరెస్ట్‌..!

బాల్య వివాహాలకు వ్యతిరేకంగా నమోదైన ఎఫ్‌ఐఆర్‌ల ఆధారంగా ఈ ఏడాది ప్రారంభంలో 2,278 మందిని అరెస్టు చేశారు. దీంతో వారి కుటుంబ సభ్యులు పోలీస్‌ స్టేషన్ల ఎదుట నిరసన చేపట్టిన విషయం తెలిసిందే. అస్సాంలో బాల్య వివాహాలు, మాతా శిశు మరణాలను తగ్గించేందుకు 14 నుంచి 18 ఏళ్ల లోపు బాలికలను వివాహం చేసుకున్నవారిని బాల్య వివాహాల నిరోధక చట్టం కింద, 14 ఏళ్ల లోపు వారిని పెళ్లి చేసుకుంటే పోక్సో చట్టం కింద అరెస్టు చేయాలని కొన్ని నెలల క్రితం అస్సాం కేబినెట్‌ నిర్ణయం తీసుకుంది. ఈ అరెస్టు ప్రక్రియ నిరంతరం కొనసాగుతుందని సీఎం ప్రకటించారు.

బాల్య వివాహం చేసుకున్న వారితో పాటు దీనికి సహకరించిన మత పెద్దలపై కూడా చర్యలు తీసుకుంటామని పేర్కొంది. బాలికల తల్లిదండ్రులకు నోటీసులు జారీ చేస్తామని వెల్లడించిన సంగతి తెలిసిందే. గత ఐదేళ్లలో బాల్య వివాహాలకు సంబంధించిన కేసుల్లో మొత్తం 3,907 మందిని అరెస్టు చేసినట్లు ఇటీవల రాష్ట్ర అసెంబ్లీలో బిశ్వశర్మ పేర్కొన్నారు.