అమెరికా పౌరులారా.. ఇరాక్‌ వదిలి వెళ్లండి

బాగ్దాద్‌: ఇరాన్‌ టాప్‌ కమాండర్‌ ఖాసీం సోలెమన్‌ను అమెరికా హతమార్చడంతో ఇరు దేశాల మధ్య యుద్ధవాతావరణం నెలకొంది. ఈ నేపథ్యంలో ఇరాక్‌లోని తమ పౌరులకు అమెరికా అత్యవసర మార్గదర్శకాలు జారీ చేసింది. ప్రస్తుతమున్న ఉద్రిక్త పరిస్థితుల దృష్ట్యా అమెరికా పౌరులు తక్షణమే ఇరాక్‌ వదిలి వెళ్లిపోవాలని బాగ్దాద్‌లోని యూఎస్‌ ఎంబసీ కోరింది. ‘అమెరికా పౌరులు వెంటనే వాయుమార్గం ద్వారా దేశం విడిచి వెళ్లండి. అది సాధ్యం కాకపోతే కనీసం రోడ్డు, రైలు మార్గం ద్వారా అయినా ఇతర దేశాలకు వెళ్లండి’ అని ఎంబసీ ఓ ప్రకటనలో తెలిపింది.

ఇరాక్‌ రాజధాని బాగ్దాద్‌లోని అంతర్జాతీయ విమానాశ్రయంపై అమెరికా ఈ ఉదయం వైమానిక దాడులు చేసిన విషయం తెలిసిందే. ఈ ఘటనలో ఇరాన్‌ టాప్‌ కమాండర్‌ ఖాసీం సోలెమన్‌ సహా ఎనిమిది మంది మృతిచెందారు. మృతుల్లో ఇరాక్‌ ఉన్నత స్థాయి కమాండర్లు కూడా ఉన్నారు. ఈ ఘటనతో మధ్యప్రాచ్యంలో యుద్ధ మేఘాలు అలుముకున్నాయి. అమెరికా చర్యను తీవ్రంగా ఖండించిన ఇరాన్‌.. ప్రతీకార దాడి తప్పదని హెచ్చరించింది. మరోవైపు అంతర్జాతీయ సమాజం నుంచి కూడా మిశ్రమ అభిప్రాయాలు వచ్చాయి. అమెరికా దాడిని కొన్ని దేశాలు సమర్థించగా.. మరికొన్ని దేశాలు ఆందోళనల వ్యక్తం చేశాయి.