బాగ్దాద్‌లో మరోసారి క్షిపణి దాడులు

ఇరాక్‌: బాగ్దాద్‌లో మరోసారి క్షిపణులతో దాడి జరిగింది. బాగ్దాద్‌ గ్రీన్‌జోన్‌ పరిధిని రెండు క్షిపణులు తాకాయి. అమెరికా రాయబారి కార్యాలయం సమీపంలో ఈ దాడి జరిగినట్లు తెలుస్తోంది. ఈ ఘటన ప్రాంతంలో అమెరికా సైన్యం ఉన్నట్లు సమాచారం. శనివారం ఉదయం సైతం ఇరాక్‌లో ఇరాన్‌ మద్దతున్న పారామిలిటరీ బలగాల కాన్వాయ్‌పై వైమానిక దాడులు జరిగాయి.   శుక్రవారం ఉదయం ఇరాక్‌ రాజధాని బగ్దాద్‌ అంతర్జాతీయ విమానాశ్రయంలో అమెరికా చేపట్టిన డ్రోన్‌ దాడిలో ఇరాన్‌ సైన్యంలోని రివల్యూషనరీ గార్డ్స్‌కు శక్తిమంతమైన కమాండర్‌గా ఉన్న జనరల్‌ ఖాసిం సులేమానీ (62) మృతి చెందిన సంగతి తెలిసిందే. ఈ ఘటనలో హషీద్‌ అల్‌ షాబీ దళ డిప్యూటీ చీఫ్‌ అబూ మహదీ అల్‌ ముహందిస్‌తో సహా మొత్తం 10 మంది చనిపోయారు. దీంతో స్పందించిన ఇరాన్‌ తీవ్ర ప్రతీకారం తప్పదని హెచ్చరించింది. వరుస దాడుల నేపథ్యంలో పశ్చిమాసియాలో ఎప్పుడు ఏమవుతుందో తెలియని పరిస్థితి ఉంది.