ఏపీ మత్స్యకారులను అప్పగించిన పాక్‌

అమృత్‌సర్‌: సుమారు 14 నెలలపాటు పాకిస్థాన్‌ చెరలో చిక్కుకున్న ఉత్తరాంధ్రకు చెందిన 20 మంది మత్స్యకారులను అక్కడి అధికారులు భారత్‌కు అప్పగించారు. పాక్‌లోని లంధి జైలు నుంచి విడుదలైన మత్స్యకారులను వాఘా సరిహద్దు వద్దకు తీసుకొచ్చి భారత అధికారులకు అప్పగించారు. మత్స్యకారులను ఏపీ మంత్రి మోపిదేవి వెంకటరమణ, అధికారులు స్వాగతం పలికి మిఠాయిలు తినిపించారు. స్వరాష్ట్రానికి తీసుకొచ్చేందుకు మంత్రి, అధికారులు అక్కడికి వెళ్లారు. 
శ్రీకాకుళం, విజయనగరం జిల్లాలకు చెందిన వేల మంది మత్స్యకారులు గుజరాత్‌లోని వీరావాల్‌లోని చేపల వ్యాపారుల వద్ద పనిచేస్తుంటారు. చేపల వేటలో భాగంగా వీరావల్‌ తీరం నుంచి సముద్రంలోకి వెళ్లిన వీరు పొరపాటున పాకిస్థాన్‌ సముద్ర జలాల్లోకి ప్రవేశించటంతో... ఆ దేశ భద్రత సిబ్బంది వీరిని 2018 నవంబరులో అదుపులోకి తీసుకుని అరెస్టు చేశారు. అప్పటి నుంచి వారంతా పాక్‌ జైళ్లలో ఉన్నారు. భారత విదేశాంగ శాఖ జోక్యంతో వీరు విడుదలయ్యారు.