జేఎన్‌యూ విద్యార్థుల ర్యాలీ భగ్నం

దిల్లీ: జవహర్‌లాల్‌ నెహ్రూ విశ్వవిద్యాలయంలో ఈనెల 5న జరిగిన ఘటనను నిరసిస్తూ దిల్లీలో విద్యార్థులు చేపట్టిన నిరసన ఉద్రిక్తతంగా మారింది. రాష్ట్రపతి భవన్‌ వరకు ర్యాలీగా వెళ్తున్న విద్యార్థులను పోలీసులు అడ్డుకున్నారు. జేఎన్‌యూ ఉపకులపతిని వెంటనే తొలగించాల్సిందిగా విద్యార్థులు డిమాండ్‌ చేశారు. ఈ విషయంపై హెచ్‌ఆర్‌డీ మంత్రిత్వ శాఖతో విద్యార్థి సంఘాలు భేటీ అయ్యాయి. జేఎన్‌యూ వీసీని తొలగించేందుకు విద్యార్థి సంఘాలు కోరగా అందుకు హెచ్‌ఆర్‌డీ నిరాకరించింది. దీంతో ఆయన్ను తొలగించాల్సిందిగా కోరుతూ రాష్ట్రపతిని కలిసేందుకు విద్యార్థులు ర్యాలీగా వెళ్లారు. ఈ నేపథ్యంలోనే ఆందోళనలో పాల్గొన్న విద్యార్థులను నిలువరించే ప్రయత్నంలో ఇరువురి మధ్య తోపులాట జరిగింది. దీంతో పలువురు విద్యార్థులను పోలీసులు బలవంతంగా వాహనాల్లోకి ఎక్కించి అక్కడి నుంచి తరలించారు. ఈ ఘటనలో ఒక విద్యార్థి గాయపడ్డాడు. దీంతో ఆందోళనకారులు పోలీసులకు వ్యతిరేకంగా నినాదాలు చేశారు. 

గత ఆదివారం జేఎన్‌యూలోకి ముసుగులతో ప్రవేశించిన కొందరు గుర్తు తెలియని వ్యక్తులు విద్యార్థులు, అధ్యాపకులపై కర్రలు, రాడ్లతో దాడికి దిగారు. ఈ ఘటనలో సుమారు 30 మందికి పైగా విద్యార్థులు గాయపడ్డారు. జేఎన్‌యూ ఘటనను పలువురు ప్రముఖులు, విద్యార్థి సంఘాలు తీవ్రంగా వ్యతిరేకిస్తున్నాయి.