వాళ్లుచేస్తే మంచి.. అదే భాజపా చేస్తే చెడా?

ఎన్‌పీఆర్‌ విమర్శకులపై జావడేకర్‌ సూటిప్రశ్న 

దిల్లీ: ఫిబ్రవరి 1న ప్రవేశపెట్టనున్న బడ్జెట్‌లో ఆర్థిక వ్యవస్థను బలోపేతం చేసే కార్యాచరణ ప్రణాళికను కేంద్ర ప్రభుత్వం ఆవిష్కరిస్తుందని కేంద్రమంత్రి ప్రకాశ్‌ జావడేకర్‌ అన్నారు. దేశ ఆర్థిక మూలాలు చాలా పటిష్టంగా ఉన్నాయని చెప్పారు. దేశ ఆర్థిక వృద్ధి రేటును అంతర్జాతీయ ద్రవ్య నిధి (ఐఎంఎఫ్‌) సంస్థ మరింతగా కుదిస్తూ సవరణ చేసిన నేపథ్యంలో అడిగిన ప్రశ్నకు ఆయన స్పందించారు. దేశ ఆర్థిక వ్యవస్థ పునరుత్తేజం దిశగా పయనిస్తోందనీ.. దీన్ని ఎవరూ నిరాశావాద దృక్పథంతో చూడాల్సిన అవసరం లేదన్నారు. జాతీయ జనాభా రిజిస్టర్‌ (ఎన్‌పీఆర్‌) ప్రక్రియపై వస్తోన్న విమర్శలను జావడేకర్‌ దీటుగా తిప్పికొట్టారు. ‘కాంగ్రెస్‌ ప్రభుత్వ హయాంలో ఇదే ప్రక్రియ చేపడితే మంచిదా? అదే భాజపా హయాంలో చేస్తే మాత్రం చెడా?’ అంటూ  విమర్శకులపై మండిపడ్డారు.