నేరస్థుడిపై కఠిన చర్యలు తప్పవు: అమిత్‌షా

దిల్లీ: దిల్లీలోని జామియా వర్శిటీ వద్ద గురువారం చోటుచేసుకున్న కాల్పులపై కేంద్ర హోంమంత్రి అమిత్‌షా స్పందించారు. ఘటనకు కారణమైన వారిపై కఠిన చర్యలు తీసుకుంటామని చెప్పారు. ఈ మేరకు ఆయన ట్విటర్‌ వేదికగా వెల్లడించారు. ‘నేను ఇప్పటికే దిల్లీ పోలీసు కమిషనర్‌తో మాట్లాడాను. కాల్పులు జరిపిన వ్యక్తిపై కఠిన చర్యలు తీసుకోవాలని ఆదేశించాను. ఈ ఘటనను కేంద్ర ప్రభుత్వం ఎంతో సీరియస్‌గా పరిగణిస్తోంది. ఇలాంటి ఘటనల్ని ఏ మాత్రం సహించేంది లేదు. నేరస్థులు ఎక్కడికీ తప్పించుకోలేరు’ అని ట్వీట్‌లో వెల్లడించారు 

దిల్లీలో సీఏఏకు వ్యతిరేకంగా జామియా వర్శిటీ నుంచి రాజ్‌ఘాట్‌కు కొందరు విద్యార్థులు ర్యాలీ చేపట్టారు. ఈ క్రమంలో జామియా ప్రాంతంలో ఓ వ్యక్తి ర్యాలీలో పాల్గొన్న వారికి వ్యతిరేకంగా నినాదాలు చేస్తూ వారిపై తుపాకీతో కాల్పులు జరిపాడు. ఈ కాల్పుల్లో ఓ విద్యార్థికి గాయాలవగా ఆస్పత్రికి తరలించారు. అనంతరం అక్కడే ఉన్న పోలీసులు నిందితుడిని అదుపులోకి తీసుకున్నారు. ఈ ఘటనతో తమ ర్యాలీకి రక్షణ కల్పించాలని వేలాదిగా విద్యార్థులు ఆ ప్రాంతంలో నిరసనకు దిగారు.