సీఏఏ తర్వాత అసోంకు తొలిసారి మోదీ

దిల్లీ: పౌరసత్వ సవరణ చట్టం(సీఏఏ) ప్రవేశపెట్టిన అనంతరం తొలిసారి ప్రధాని నరేంద్రమోదీ అసోం పర్యటన ఖరారైంది. ఫిబ్రవరి 7న అసోంకు వెళ్లనున్న మోదీ బోడోల ప్రాబల్యం ఉన్న కోక్రజర్‌ పట్టణంలో నిర్వహించే బహిరంగ సభలో ప్రసంగించనున్నట్లు అధికార వర్గాలు వెల్లడించాయి. బోడో తీవ్రవాద బృందాలు, విద్యార్థి సంఘాలతో కేంద్ర ప్రభుత్వం శాంతి ఒప్పందం చేసుకున్న తర్వాత ఈ పర్యటన జరుగుతుండటం విశేషం. గత వారం జరిగిన బోడో అభివృద్ధి ఒప్పందం అనంతరం 1500 మంది తీవ్రవాదులు లొంగిపోయారు. కేంద్రం పౌరసత్వ సవరణ చట్టాన్ని తీసుకువచ్చినప్పటి నుంచి ఈశాన్య రాష్ట్రాల్లో నిరసనలు ఊపందుకున్న విషయం తెలిసిందే. ఈ నిరసనల కారణంగా గతనెలలో అసోంలో నిర్వహించిన ఖేలో ఇండియా ప్రారంభోత్సవ కార్యక్రమానికి కూడా ప్రధాని హాజరుకాలేదు. అంతేకాకుండా డిసెంబర్లో ఉండాల్సిన జపాన్‌ ప్రధాని షింజో అబే పర్యటన కూడా రద్దయింది.