ఒమర్‌ అబ్దుల్లా అరెస్టుపై సుప్రీంలో సవాల్‌..!

దిల్లీ: జమ్మూ-కశ్మీర్‌ మాజీ ముఖ్యమంత్రి ఒమర్‌ అబ్దుల్లాను ప్రజా భద్రత చట్టం(పీఎస్‌ఏ) కింద నిర్బంధించడాన్ని సవాల్‌ చేస్తూ ఆయన సోదరి సారా అబ్దుల్లా పైలట్‌ సుప్రీం కోర్టు ఆశ్రయించారు. దీనిపై అత్యవసర విచారణ చేపట్టాలన్న ఆమె అభ్యర్థనను సోమవారం జస్టిస్‌ ఎన్‌.వి.రమణ నేతృత్వంలోని ధర్మాసనం అంగీకరించింది. అరెస్టు వల్ల అబ్దుల్లా జీవించే హక్కు, వ్యక్తిగత స్వేచ్ఛకు భంగం వాటిల్లుతోందని పిటిషన్‌లో పేర్కొన్నారు. పిటిషనర్‌ తరఫు న్యాయవాది కపిల్‌ సిబల్‌ మాట్లాడుతూ అబ్దుల్లా అరెస్టును సవాల్‌ చేస్తూ హెబియస్‌ కార్పస్‌ పిటిసన్‌ను దాఖలు చేశామని వెల్లడించారు. ఈ వారంలో దీనిపై విచారణ జరపాలని కోరామన్నారు.

జమ్మూ-కశ్మీర్‌ మాజీ ముఖ్యమంత్రులు మెహబూబా ముఫ్తీ, ఒమర్‌ అబ్దుల్లాపై కఠినమైన ప్రజా భద్రత చట్టం (పీఎస్‌ఏ) కింద కేసులు నమోదయ్యాయి. గత ఏడాది ఆగస్టు 5న జమ్మూ-కశ్మీర్‌కు ప్రత్యేక ప్రతిపత్తి రద్దు చేసినప్పటి నుంచి వీరిద్దరితో సహా అనేక మంది నేతలు గృహ నిర్బంధంలో ఉన్నారు. ఇటీవల అధికారులు వీరిపై పీఎస్‌ఏను ప్రయోగించారు.