రోజుకూలీ.. ఒక్కరోజులో కోటీశ్వరుడయ్యాడు!

కన్నూర్‌: అతడో రోజువారీ కూలీ. పనిచేస్తే గానీ పూటగడవదు. అయితేనేం అతడి కష్టాలను గట్టెక్కించేందుకు అదృష్టం లాటరీ రూపంలో తలుపుతట్టింది. రాత్రికి రాత్రే కోటీశ్వరుడిని చేసింది. కేరళకు చెందిన ఓ రోజు కూలీ లాటరీలో రూ. 12కోట్లు గెలుచుకున్నాడు. 

కేరళలోని కన్నూర్‌ జిల్లా పురలిమాలా కురిచియా కాలనీకి చెందిన 55 ఏళ్ల పొరున్నన్‌ రాజన్‌ దినసరి కూలీ. రెక్కడాడితే గానీ డొక్కాడదు. అవసరం కోసం అప్పులు తప్పలేదు. అలా మూడు వారాల క్రితం ఓ రోజు రాజన్‌ రుణం కోసం వెళ్తుండగా మార్గమధ్యంలో లాటరీ టికెట్‌ సేల్ ఆకర్షించింది. అదృష్టంపై నమ్మకం లేకపోయినా ఎక్కడో ఓ ఆశ టికెట్‌ కొనాలని ప్రేరేపించింది. అలా రూ.300 పెట్టి క్రిస్మస్‌-న్యూఇయర్‌ బంపర్‌ లాటరీ టికెట్‌ కొన్నాడు. అంత ఖరీదు పెట్టి లాటరీ కొన్నానని చెబితే ఇంట్లో వారు ఏమంటారోనని ఎవరికీ చెప్పలేదు. 

గత సోమవారం ఈ లాటరీ విజేతలను సదరు ఏజెన్సీ సంస్థ ప్రకటించగా.. అందులో రాజన్‌ కొన్న టికెట్‌కు బంపర్‌ ఆఫర్‌ తగలింది. ఈ లాటరీలో అతడు ఏకంగా రూ. 12కోట్లు గెలుచుకున్నాడు. దీంతో అతడి ఆనందానికి అవధులు లేకుండా పోయాయ్‌. ‘లాటరీ గెలుస్తానని కలలో కూడా అనుకోలేదు. ఈ డబ్బుతో ఇప్పుడు నా అప్పులన్నీ తీరుతాయి. మంచి ఇల్లు కూడా కట్టుకోవచ్చు. నా కూతుర్ని పై చదువులు చదివించొచ్చు’ అని సంతోషంగా చెబుతున్నాడు రాజన్‌.