దోషులకు డెత్‌ వారెంట్‌.. నిర్భయ తల్లి హర్షం 

దిల్లీ: ‘నిర్భయ’ దోషులకు మార్చి 3న ఉరి తీసేందుకు పటియాలా హౌస్‌ కోర్టు డెత్‌ వారెంట్‌ జారీ చేయడం పట్ల నిర్భయ తల్లి హర్షం వ్యక్తంచేశారు. ఈ సందర్భంగా ఆమె మాట్లాడుతూ.. ఇప్పటికే ఉరిశిక్ష అమలు చాలా ఆలస్యమైందనీ.. అయినా తాజాగా కోర్టు ఇచ్చిన తీర్పు సంతోషం కలిగించిందని చెప్పారు. న్యాయం కోసం తామెంతగానో పోరాటం చేశామని గుర్తు చేసుకున్నారు. తన కుమార్తెను కిరాతకంగా బలితీసుకున్న ఆ మృగాళ్లకు చివరకు డెత్‌ వారెంట్‌ జారీ చేయడం హర్షణీయమన్నారు. మార్చి 3న దోషులకు కచ్చితంగా ఉరిశిక్ష అమలుచేస్తారని ఆశిస్తున్నామని అన్నారు. 

సంచలనం సృష్టించిన నిర్భయ అత్యాచారం, హత్య కేసులో దోషులను ఉరితీసేందుకు కొత్త తేదీ ఖరారైంది. మార్చి 3 ఉదయం 6 గంటలకు వారిని ఉరి తీయాలంటూ దిల్లీ పటియాలా హౌస్‌ కోర్టు సోమవారం కొత్త డెత్‌ వారెంట్‌ జారీ చేసిన విషయం తెలిసిందే. ఈ కేసులో తమకు ఉరిశిక్ష వాయిదా పడేలా దోషులు అనేక ప్రయత్నాలూ చేశారు. చివరి నిమిషంలో కొత్త పిటిషన్లు దాఖలు చేస్తుండటంతో శిక్ష అమలు వాయిదా పడుతూ వచ్చింది. వాస్తవానికి జనవరి 22నే ఈ మృగాళ్లను ఉరితీయాల్సి ఉండగా.. దోషుల్లో ఒకడైన ముకేశ్‌ క్షమాభిక్ష పిటిషన్‌ రూపంలో శిక్ష అమలుకు ఆటంకం ఏర్పడింది. ఆ తర్వాత ఫిబ్రవరి 1న ఉరితీసేందుకు దిల్లీ కోర్టు రెండోసారి డెత్‌ వారెంట్‌ జారీచేసినా అదీ వాయిదా పడింది. ఈ నేపథ్యంలో మూడోసారి దోషులు ముకేశ్‌కుమార్‌, పవన్‌ గుప్తా, వినయ్‌ కుమార్‌ శర్మ, అక్షయ్‌ కుమార్‌ నలుగురినీ ఒకేసారి మార్చి 3న ఉరిశిక్ష విధించాలని తాజాగా న్యాయస్థానం తీర్పు వెలువరించింది.