విమాన ఇంజిన్‌లో మంటలు..! 

అహ్మదాబాద్‌-బెంగళూరు విమానానికి తప్పిన ప్రమాదం 

అహ్మదాబాద్‌: అహ్మదాబాద్‌ నుంచి బెంగళూరు వెళ్లే గోఎయిర్‌ విమానానికి తృటిలో ప్రమాదం తప్పింది. అహ్మదాబాద్‌ విమానాశ్రయం నుంచి బయలుదేరుతున్న సమయంలో విమాన ఇంజిన్‌లో అకస్మాత్తుగా మంటలు చెలరేగాయి. దీంతో అప్రమత్తమైన సిబ్బంది విమానంలోని ప్రయాణికులను దించివేశారు. ఈ ఉదయం ఎయిర్‌పోర్టులో ప్రయాణానికి సిద్దంగా ఉన్న G8 802 విమాన కుడిభాగం ఇంజిన్‌లో మంటలు చెలరేగాయని విమాన సంస్థ పేర్కొంది. అయితే ఈ ప్రమాదంలో ప్రయాణికులకు ఎటువంటి ప్రమాదం జరగలేదని ప్రకటించింది. ప్రయాణికులు వెళ్లడానికి మరో విమానాన్ని సమకూర్చామని గోఎయిర్‌ వెల్లడించింది.