మోస్ట్‌ వాంటెడ్‌ గ్యాంగ్‌స్టర్ రవి పుజారీ అరెస్ట్‌

బెంగళూరు: పరారీలో ఉన్న కరుడుగట్టిన గ్యాంగ్‌స్టర్‌ రవి పుజారీని పోలీసులు ఎట్టకేలకు అరెస్టు చేశారు. సెనెగల్‌ దేశం నుంచి సోమవారం వేకువజామున భారత్‌కు తీసుకొచ్చారు. పోలీసుల వివరాల ప్రకారం.. పుజారీ దక్షిణాఫ్రికా దేశంలోని ఓ మారుమూల గ్రామంలో తలదాచుకున్నాడు. సమాచారం అందుకున్న భారత నిఘా వర్గాలు సెనెగల్‌ భద్రతా దళాలకు సమాచారం అందజేశాయి. వెంటనే దక్షిణాఫ్రికాలో పుజారీ ఉంటున్న ఇంటికి చేరుకున్న వారు సెనెగల్‌ తీసుకొచ్చారు. అక్కడ విచారణ పూర్తయిన తర్వాత భారత పోలీసు అధికారులకు అప్పగించారు. భారత్‌ నుంచి తొలుత సెనెగల్‌ పారిపోయిన అతడు అక్కడా అనేక నేరాలకు పాల్పడ్డాడు. మాదక ద్రవ్యాల అక్రమ రవాణా, దోపిడీ రాకెట్లలో ప్రధాన నిందితుడు. దీంతో అతణ్ని అరెస్టు చేసి జైల్లో ఉంచగా.. అక్కడి నుంచి తప్పించుకొని దక్షిణాఫ్రికాకు పారిపోయాడు. అతని వద్ద బుర్కినాఫసో దేశానికి చెందిన పాస్‌పోర్టు ఉన్నట్లు గుర్తించారు. భారత్‌లో రవి పుజారీపై దాదాపు 200 కేసులు నమోదయ్యాయి. అతడి స్వస్థలమైన బెంగళూరులోనే 79 కేసులు ఉన్నాయి. కర్ణాటకలో అతడికి పెద్ద నెట్‌వర్క్‌ ఉన్నట్లుగా పోలీసులు తెలిపారు.