అంతొద్దు, ఇది చాలు అంటున్న ప్రిన్స్‌ హ్యారీ

నన్ను ‘హ్యారీ’ అని మాత్రమే పిలవండి అంటున్న బ్రిటన్‌ యువరాజు

లండన్‌: తనను కేవలం ‘హ్యారీ’ అని మాత్రమే సంబోధించాల్సిందిగా బ్రిటన్‌ యువరాజు ప్రిన్స్‌ హ్యారీ కోరారు. తన పర్యాటక ప్రాజెక్టు ‘ట్రావలిస్ట్‌’ కు సంబంధించి ఎడింబరోలో జరిగిన ఓ సమావేశంలో ఆయన బుధవారం పాల్గొన్నారు. ఈ సమావేశానికి ఆయన రైలులో రావటం గమనార్హం. బ్రిటన్‌ మహారాణి క్వీన్‌ ఎలిజబెత్‌ 2 రెండవ మనవడైన ప్రిన్స్‌ హ్యారీ, ఆయన భార్య మేఘాన్‌ మెర్కెల్‌ మార్చి నెలాఖరు నుంచి తన ‘హిజ్‌ రాయల్‌ హైనెస్‌’ అనే గౌరవార్థకాన్ని కోల్పోనున్నారు. అయితే మార్చి లోగానే హ్యారీ సాధారణ జీవితాన్ని ఆహ్వానిస్తున్నట్టు ఈ ప్రకటనతో స్పష్టమయ్యింది. 

‘‘తనను హ్యారీ అని మాత్రమే పిలవాల్సిందిగా ఆయన స్పష్టం చేసినందువల్ల హ్యారీకి ఘన స్వాగతాన్ని ఇవ్వాల్సిందిగా కోరుతున్నాను’’ అని ఆ కార్యక్రమ నిర్వాహకురాలు అయేషా హజారికా ప్రకటించారు. బ్రిటన్‌ సింహాసనపు వారసత్వ వరుసలో హ్యారీ ఆరవ వారు. తను, తన భార్య రాచరికపు హోదానుంచి తప్పుకోవాలనుకుంటున్నామంటూ జనవరిలో ప్రిన్స్‌ హ్యారీ చేసిన ప్రకటన ఇంగ్లండు రాజరిక వ్యవస్థలో ప్రకంపనలు సృష్టించింది.