కేంద్రానికి దిల్లీ హైకోర్టు నోటీసులు

దిల్లీ: కేంద్రంతో పాటు, దిల్లీ ప్రభుత్వం, దిల్లీ పోలీసులకు దిల్లీ హైకోర్టు నోటీసులు జారీ చేసింది. కాంగ్రెస్‌ నాయకులు సోనియా గాంధీ, ప్రియాంక గాంధీ, రాహుల్‌ గాంధీ విద్వేషపూరిత ప్రసంగాలు చేసినందుకు వారిపై కేసు నమోదు చేయాలని దాఖలైన పిటిషన్లపై శుక్రవారం విచారణ చేపట్టింది. ఈ సందర్భంగా వివరణ కోరుతూ జస్టిస్‌ డీఎన్‌ పటేల్, జస్టిస్‌ సి.హరి శంకర్‌తో కూడిన ధర్మాసనం కేంద్ర హోం మంత్రిత్వశాఖకు, దిల్లీ ప్రభుత్వానికి, పోలీసులకు నోటీసులు జారీ చేసింది. తదుపరి విచారణను ఏప్రిల్ 30కి వాయిదా వేసింది. దాంతో పాటు దిల్లీ ఉప ముఖ్యమంత్రి మనీశ్‌ సిసోడియా, ఆమ్‌ ఆద్మీ పార్టీ (ఆప్) ఎమ్మెల్యే అమనతుల్లా ఖాన్‌, ఏఐఎమ్‌ఐఎమ్‌ నేతలు అక్బరుద్దీన్‌ ఒవైసీ, వారిస్‌ పఠాన్‌లపై కేసు నమోదు చేయాలని దాఖలైన పిటిషన్లపై కూడా స్పందించాలని కోరింది. విద్వేషపూరిత ప్రసంగాలు చేసే వారిని గుర్తించేందుకు ప్రత్యేక దర్యాప్తు బృందాలను నియమించాలని, పౌరసత్వ సవరణ చట్టం (సీఏఏ) వ్యతిరేక నిరసనల వెనక ఉన్నవారిని గుర్తించాలని దాఖలైన పిటిషన్లపై కూడా స్పందిచాలని నోటీసులో పేర్కొంది.