దేశంలో మరో కరోనా కేసు నమోదు!

జైపూర్‌: ఇటలీ నుంచి జైపూర్‌కు వచ్చిన ప్రయాణికుడికి సోమవారం కరోనా వైరస్‌ పాజిటివ్‌గా తేలిందని రాజస్థాన్‌ ఆరోగ్య శాఖ అధికారులు తెలిపారు. అతడి రక్త నమూనాలను మరోసారి పరీక్షించేందుకు పుణెలోని ఎన్‌ఐవీకి పంపినట్లు తెలిపారు. రాజస్థాన్‌ ఆరోగ్య శాఖ మంత్రి రఘు శర్మ మీడియాతో మాట్లాడుతూ.. ‘ఫిబ్రవరి 29న ఇటలీ నుంచి జైపూర్‌ వచ్చిన ప్రయాణికుడిని స్క్రీనింగ్ నిర్వహించగా కరోనా లక్షణాలున్నట్లు తేలింది. దీంతో అతడిని ఐసోలేషన్‌ వార్డుకు పంపించాం. అనంతరం మొదటిసారి పరీక్షలు నిర్వహించగా నెగెటివ్‌గా తేలింది. సోమవారం మరోసారి పరీక్షలు నిర్వహించగా పాజిటివ్‌గా నిర్దారణైంది. రెండు సార్లు వేర్వేరుగా ఫలితం రావడంతో అతడి రక్త నమూనాలను మరోసారి పరీక్షించేందుకు పుణెలోని ఎన్‌ఐవీకి పంపించాం. ఫిబ్రవరి 29న ఆ వ్యక్తికి దగ్గరగా ఉన్న వారిని సైతం స్క్రీనింగ్‌ చేస్తున్నాం. ప్రస్తుతం అతడిని జైపూర్‌లోని ఆస్పత్రిలో ఐసోలేషన్‌ వార్డులో ఉంచాం’ అని తెలిపారు.