పాకిస్థాన్‌లో కుప్పకూలిన ఎఫ్‌ -16 విమానం

ఇస్లామాబాద్‌: పాకిస్థాన్‌ ఎయిర్‌ఫోర్స్‌ (పీఏఎఫ్‌)కు చెందిన ఎఫ్‌ 16 యుద్ధ విమానం కుప్పకూలింది. మార్చి 23న పాకిస్థాన్‌ డే సందర్భంగా నిర్వహించబోయే పరేడ్‌ కోసం చేపట్టిన రిహార్సల్స్‌లో ఈ ఘటన చోటుచేసుకున్నట్టు అధికారులు వెల్లడించారు. ఇస్లామాబాద్‌లోని షెకర్‌పారియన్‌ సమీపంలో ఈ దుర్ఘటన జరగ్గా.. సహాయక బృందాలు అక్కడికి చేరుకొన్నాయి. ఈ ప్రమాదానికి దారితీసిన కారణాలపై ఉన్నతాధికారులు దర్యాప్తునకు ఆదేశించారు. ఈ విమానంలో పైలట్‌ నుమాన్‌ అక్రమ్‌ మృతిచెందినట్టు సమాచారం.  ఈ ఘటనకు సంబంధించిన వీడియోలు సోషల్‌ మీడియాలో వైరల్‌గా మారాయి.

అయితే, ఈ విమానం కుప్పకూలడానికి ముందే పైలట్లు సురక్షితంగా బయటపడి ఉంటారని కొన్ని మీడియా సంస్థలు పేర్కొంటున్నాయనీ.. ఆ వార్తలు నిజం కావాలని కోరుకుంటున్నట్టు పాక్‌ మానవహక్కుల శాఖ మంత్రి షిరీన్‌ మజారీ ట్వీట్‌ చేశారు.