కరోనా రోబోలు    

కేరళ స్టార్టప్‌ మిషన్‌ వినూత్న ప్రయత్నం     

ఇంటర్నెట్‌ డెస్క్‌: కరోనా ప్రజలలో తీవ్రభయాందోళనలు సృష్టిస్తున్న వేళ కేరళ ప్రభుత్వ అనుబంధ సంస్థ వినూత్న ప్రయత్నం చేస్తోంది. రోబోలతో కొవిడ్‌-19పై అవగాహన కల్పించటంతో పాటు, ప్రజలకు స్వయంగా మాస్కులను అందిస్తోంది. హ్యూమనాయిడ్‌ రోబోలతో కరోనా వ్యాపించిన వారికి వైద్య సహాయం కూడా చేయవచ్చని చెబుతోంది. ఇప్పటికే కరోనా వైరస్‌ అనేక దేశాలలో మరణ మృందంగం మోగిస్తుండగా, వేల సంఖ్యలో ప్రజలు మృతిచెందారు. ఈ వైరస్‌ వ్యాప్తిని అరికట్టడానికి అనేక దేశాలు యుద్ధ ప్రాతిపదికన అనేక చర్యలు చేపడుతున్నాయి. ఈ వ్యాధి సోకిన వారికి వైద్యం అందిస్తున్న వైద్యులకు సైతం వ్యాధి అంటుకుని వారు కూడా మృతి చెందిన ఘటనలు వెలుగు చూశాయి. ఈ నేపథ్యంలో వైద్యులకు, సిబ్బందికి ఇబ్బందులు తలెత్తకుండా కేరళ ప్రభుత్వ అనుబంధ సంస్థ రోబోల అంశం తెరపైకి తీసుకొచ్చింది.  వైద్యం అందించటం కోసం హ్యూమనాయిడ్‌ రోబోలను రంగంలోకి దించింది. రెండు రోబోలను అభివృద్ధి చేసిన ఈ కేరళ స్టార్టప్‌ మిషన్‌ ప్రపంచ ఆరోగ్య సంస్థ ప్రమాణాల ప్రకారం కరోనా వైరస్‌కు సంబంధించిన అన్ని విషయాలను వాటిలో పొందుపరిచింది. ఈ రోబోలు వైరస్‌కు సంబంధించిన అన్ని రకాల విషయాలు ప్రజలకు వివరిస్తున్నాయి. శానిటైజర్‌లు, మాస్కులు, తదితరాలను స్వయంగా అందిస్తున్నాయి. కరోనా వైరస్‌ గురించి కచ్చితమైన సమాచారాన్ని ఈ రోబోల ద్వారా ప్రజలకు చేరవేసేందుకు ప్రయత్నిస్తున్నట్లు అసిమో రోబోటిక్స్‌ సీఈవో జయకృష్ణన్‌ వివరించారు. గతంలో  కేరళలో నిఫా వైరస్‌ ప్రబలిన తర్వాత ఈ  రోబోలను అభివృద్ధి చేశామన్నారు. భయానక వైరస్‌లు వ్యాప్తి చెందుతున్నపుడు బాధితుల వద్దకు వెళ్లడానికి వైద్యులు సిబ్బంది భయపడుతుంటారని, వారికీ వ్యాధి సోకే అవకాశం ఉంటుందని, ఈ ముప్పును బాగా తగ్గించడానికే వీటిని తయారు చేశామని ఆయన వివరించారు. వీటిలో ఒక రోబో శానిటైజర్‌లు, తదితరాలను అందిస్తుండగా, మరో రోబో  వైరస్‌ గురించి ప్రజలకు అవగాహన కలిగిస్తుందని ఆయన చెప్పారు.